Сябры валянтэрскай службы праваабарончага цэнтру «Вясна», якія займаюцца маніторынгам, наладзілі ў менскім парку Дружбы Народаў пікет-манстрацыю «За адмену ўсіх забаронаў і забарону ўсіх адменаў».
Такім чынам яны вырашылі праверыць, як функцыянуе на практыцы паведамляльны прынцып аб правядзеньні мірнага сходу, прадугледжаны законам аб масавых мерапрыемствах, які ўступіў у сілу зь іншымі зьменамі 26 студзеня.
«Другой нашай мэтай было выказаць сваё меркаваньне адносна свабоды сходаў у Беларусі», — сказала карэспандэнту Свабоды праваабаронца Натальля Сацункевіч.
ГЛЯДЗІЦЕ ТАКСАМА: Менгарвыканкам папярэдзілі: 6 сакавіка будзе «манстрацыя»Паводле ўдзельнікаў, манстрацыя — мастацкая акцыя зь лёзунгамі і транспарантамі, якія прыцягваюць да сябе ўвагу абсурдам і гіпэрбалізацыяй.
Паводле БелаПАН, шасьцёра ўдзельнікаў акцыі трымалі плякаты «Пралетарыі ўсіх краін, звальняйцеся», «Гаршчочак, не вары», «Ой, усё!», «Свабода — жаночага роду». На адным з плякатаў намаляваны сабака, якога выгульваюць у парку.
Супрацоўнікі міліцыі вялі відэаздымкі.
Паводле Натальлі Сацункевіч, удзельнікі акцыі заключылі дамову з ГУУС Менгарвыканкаму на 76,5 рубля за паслугі па ахове грамадзкага парадку і яшчэ дзьве дамовы, кошт якіх пакуль невядомы, з хуткай дапамогай і зь «Зелянбудам».
Раней валянтэры «Вясны» прыйшлі да высновы, што месцы, вызначаныя для мірных сходаў, ня надта прыдатныя для масавых мерапрыемстваў з гледзішча іх дасяжнасьці і публічнасьці.
ГЛЯДЗІЦЕ ТАКСАМА: Бангалор-4, Бангалор-5, Бангалор-6. У Менску падвоілі колькасьць месцаў для мітынгаў