Амбасаду Расеі ў Кіеве закідалі дымавымі шашкамі. ФОТА, ВІДЭА 

Акцыя пратэсту супраць нападу расейскіх вайскоўцаў на ўкраінскія караблі на ўваходзе ў Азоўскае мора прайшла каля амбасады Расеі ў Кіеве.

Позна ўвечары 25 лістапада каля амбасады Расеі ў Кіеве актывісты і вэтэраны правялі акцыю пратэсту супраць агрэсіі Расеі ў Чорным моры.

Амбасаду Расеі закідалі дымавымі шашкамі, таксама людзі спрабавалі падпаліць шыны, якія прынесьлі да агароджы амбасады, але іх спынілі сілавікі, якія заклікалі пратэстоўцаў не парушаць грамадзкі парадак.

​

Карэспандэнт Свабода паведаміў пра ахоплены агнём аўтамабіль з дыпляматычнымі нумарамі амбасады Расеі, які стаяў непадалёк ад будынка дыпмісіі, у завулку Яраслава Хомава.

Атака ў Азоўскім моры

Раніцай 25 лістапада расейскі пагранічны карабель пратараніў буксір Ваенна-марскіх сіл Узброеных сіл Украіны. Два малыя ўкраінскія браняваныя артылерыйскі катэры і рэйдавы буксір ажыцьцяўлялі плянавы пераход з порту Адэсы ў порт Марыюпаль Азоўскага мора. У камандаваньні ВМС Украіны адзначылі, што пра намер ажыцьцяўляць пераход было паведамлена загадзя ў адпаведнасьці з міжнароднымі нормамі.

ГЛЯДЗІЦЕ ТАКСАМА:

Зьявілася відэа тарану ўкраінскага буксіра. ВІДЭА

Аднак, як адзначае ўкраінскі бок, насуперак Канвэнцыі ААН па марскім праве і дамовы паміж Украінай і Расеяй аб супрацоўніцтве ў выкарыстаньні Азоўскага мора і Керчанскай пратокі, пагранічны карабель РФ «Дон» пратараніў украінскі рэйдавы буксір, у выніку чаго пашкоджаны галоўны рухавік карабля, абшыўка і леерная агароджа, згублены выратавальны плот.

ГЛЯДЗІЦЕ ТАКСАМА:

Украіна заявіла, што расейскі спэцназ захапіў яе судны. Парашэнка склікае Ваенны кабінэт

Расея ж заяўляе, што ўкраінскія караблі «неправамерна» зайшлі ў часова зачыненую акваторыю тэрытарыяльнага мора РФ. У ФСБ сьцьвярджаюць, што ў іх не было заяўкі на праход караблёў і ў графік праходу праз Керчанскую пратоку яны не былі ўключаны.

У выніку атакі расейскіх вайсковых і памежных караблёў на карабельную групу ВМС Украіны паранена шэсьць украінскіх вайскоўцаў, паведаміў афіцыйны Кіеў.

ГЛЯДЗІЦЕ ТАКСАМА:

Расея назвала свой напад на ўкраінскія караблі «правакацыяй Кіева»

У сувязі з захопам Расеяй трох украінскіх суднаў у Азоўскім моры Ўзброеныя сілы Ўкраіны прыведзеныя ў поўную баявую гатоўнасьць.

26 лістапада пасьля паўночы на пасяджэньні Рады нацыянальнай бясьпекі і абароны Ўкраіны было прынятае рашэньне аб падрыхтоўцы да ўвядзеньня ваеннага становішча ва Ўкраіне на 60 дзён з-за нападу Расеі. Гэтае пытаньне парлямэнт Украіны павінен разгледзець вечарам 26 лістапада на закрытым пасяджэньні, пачатак якога заплянаваны на 16-ю гадзіну.

ГЛЯДЗІЦЕ ТАКСАМА:

«Адкрытае парушэньне міжнароднага права». Рэакцыі на канфлікт Расеі і Ўкраіны ў Азоўскім моры

У апошні час расейцы ўсё больш актыўна блякуюць Азоўскае мора пагранічнымі караблямі, раней яны перагарадзілі Керчанскую пратоку мостам. У выніку грузапаток украінскіх партоў падае і рэгіёну пагражаюць эканамічныя праблемы. 25 кастрычніка 2018 Эўрапарлямэнт заклікаў Эўразьвяз узмацніць санкцыі супраць РФ у выпадку абвастрэньня сытуацыі ў Азоўскім моры.