На плошчы Шумана ў Брусэлі беларускія актывісты зладзілі пікет з мэтай зьвярнуць увагу на перасьлед ў Беларусі лідэраў апазыцыі і ўдзельнікаў дазволенага мітынгу-канцэрту 25 сакавіка.
Цягам 25 сакавіка ў Менску і рэгіёнах былі затрыманы больш за 100 чалавек — у тым ліку ў месцах, дзе імпрэзы былі дазволеныя ўладамі.
«Праз чалавечую абыякавасьць адбываюцца самыя страшныя злачынствы, — адзначыў з гэтай нагоды актывіст беларускага руху ў Бэльгіі Мірон Крывіч. — Хто прамаўчаў падчас гвалту над іншым, той сам заслугоўвае яшчэ большага гвалту».
Беларусы Бэльгіі
Некалькі чалавек выйшлі ў Брусэлі пад бел-чырвона-белымі сьцягамі. Яны таксама трымалі плякаты ў гонар 100-гадовага юбілею абвяшчэньня незалежнасьці Беларускай Народнай Рэспублікі і патрабаваньнем вызваленьня палітвязьняў.