Сіманаўскі суд Масквы на 8 сутак арыштаваў Руслана Шаведзінава, прэс-сакратара кампаніі расейскага апазыцыянэра Аляксея Навальнага і вядучага YouTube-каналу «Навальный Live». Шаведзінава прызналі вінаватым па артыкуле аб парушэньні правілаў правядзеньня мітынгу за асьвятленьне акцыяў у падтрымку страйку выбарнікаў. Пра гэта з залі суду паведаміў карэспандэнт Радыё Свабода.
Руслан Шаведдинов 8 суток ареста pic.twitter.com/tjWImCboky
— Ivan Zhdanov (@IoannZH) January 31, 2018
Шаведзінава арыштавалі, нягледзячы на тое, што ён ня ўдзельнічаў у арганізацыі усерасейскага пратэсту 28 студзеня і не вёў твітэр «Навальный Live», дзе нібыта публікаваліся заклікі да правядзеньня несанкцыянаванай акцыі. Пра гэта заявіў Вячаслаў Гімадзі, адвакат асуджанага. Ён адзначыў, што Шаведзінаў удзельнічаў у відэатрансьляцыі страйку выбарнікаў, знаходзячыся па-за межамі Расеі, а экстэрытарыяльнасьць прымяненьня закону, як выказаўся адвакат, пагражае Расеі міжнародным скандалам.
По Руслану:- свидетели подтвердили, что он не организовывал митинг, а лишь освещал его;- твиттер НL ведется вообще не им;- во время трансляции 28.01 Руслан был не в РФ, а экстерриториальное применение закона светит международным скандалом (ст. 1.8 КоАП);- повторности нет.
— Vyacheslav Gimadi (@vigimadi) January 31, 2018
Шаведзінава затрымалі 30 студзеня ў маскоўскім аэрапорце Шарамецьцева разам з Кірай Ярмыш, прэс-сакратаром апазыцыянэра Аляксея Навальнага, пасьля вяртаньня ў Расею. 28 студзеня Ярмыш і Шаведзінаў вялі на YouTube-канале «Навальный Live» відэатрансьляцыю з акцый у падтрымку страйку выбаршчыкаў. Прамы эфір быў арганізаваны зь іншай краіны, каб яго не сарвалі паліцыянты, як гэта адбывалася падчас папярэдніх акцый пратэсту, арганізаваных Навальным.
Пасьля затрыманьня Ярмыш і Шаведзінаву вылучылі абвінавачваньні па артыкуле аб парушэньні правілаў правядзеньня мітынгу. Прысуд Ярмыш яшчэ не вынесьлі.
Руслан и Кира передают всем привет pic.twitter.com/i9N9A7YrNg
— Ivan Zhdanov (@IoannZH) January 30, 2018
Навальны заклікаў да страйку выбарнікаў пасьля таго, як яму адмовілі ў рэгістрацыі кандыдатам на прэзыдэнцкіх выбарах у Расеі. Акцыі 28 студзеня прайшлі ў дзесятках расейскіх гарадоў, у іх удзельнічалі тысячы чалавек. Трансьляцыю з пратэстаў паглядзелі больш за паўтара мільёна чалавек. Па ўсёй краіне былі затрыманыя 350 актывістаў. У сераду за пратэст 28 студзеня на 30 сутак таксама быў арыштаваны Дзяніс Міхайлаў, каардынатар штаба Навальнага ў Санкт-Пецярбургу.