З адпаведнай просьбай да генэральнага сакратара ААН Антонію Гутэрыша зьвярнуліся Францыя, Балівія, Эгіпет, Італія, Сэнэгал, Швэцыя, Вялікая Брытанія і Ўругвай.
«Я пасьлядоўна выступаў супраць любых аднабаковых захадаў, якія паставілі пад пагрозу пэрспэктыву міру для ізраільцян і палестынцаў», — сказаў генэральны сакратар ААН.
«У гэты трывожны момант я хачу даць зразумець: альтэрнатывы рашэньню пра дзьве дзяржавы няма, няма пляну Б», — сказаў ён.
Прэзыдэнт Дональд Трамп у сваёй прамове 6 сьнежня сказаў, што гэты крок быў усяго толькі «прызнаньнем рэальнасьці». «Сёньня мы нарэшце прызнаем відавочнае, што Ерусалім зьяўляецца сталіцай Ізраілю», — сказаў ён.
Трамп даручыў Дзяржаўнаму дэпартамэнту ЗША пачаць падрыхтоўку да пераводу амбасады ЗША з Тэль-Авіву ў Ерусалім. Як кажуць экспэрты, гэта можа заняць ад трох да чатырох гадоў.
Гэтая заява зьмяніла палітыку ЗША некалькіх дзесяцігодзьдзяў, згодна зь якой статус гораду павінен вырашацца на перамовах з палестынцамі.
Краіны Блізкага Ўсходу асудзілі такое рашэньне Трампа, а эўрапейскія лідэры, баючыся ўспышкі гвалту, заклікалі да спакою усе бакі.