Магілёўскі праваабаронца Аляксандар Буракоў вінаваціць міліцыю ў распальваньні міжнацыянальнай варажнечы. Актывіст даслаў скаргу ў абласную пракуратуру, каб тая дала прававую ацэнку публікацыі на афіцыйным сайце Ўпраўленьня ўнутраных спраў Магілёўскага аблвыканкаму. У публікацыі згадваецца этнічная прыналежнасьць аднаго з затрыманых — некалькі разоў ужыты выраз «прадстаўнік этнічнай дыяспары цыганоў».
Праваабаронца: сёньня злачынцы цыганы, заўтра — беларусы
На думку праваабаронцы, прадстаўнікам улады недапушчальна акцэнтаваць увагу на этнічнай прыналежнасьці грамадзян, якія падазраюцца ў зьдзяйсьненьні правапарушэньняў:
«Я лічу, што падыход павінен быць да ўсіх аднолькавы. У адваротным выпадку сёньня злачынцамі назвалі цыганоў, заўтра беларусаў, і гэтак далей».
Аляксандар Буракоў лічыць, што сваёй публікацыяй міліцэйскае ведамства праігнаравала адну з рэкамэндацый Сьледчага камітэту для мас-мэдыя: «Каб пазьбегнуць распальваньня нацыянальнай нянавісьці ці варожасьці, ня варта фіксаваць увагу чытачоў і гледачоў на нацыянальнай прыналежнасьці асобаў, якія ўчынілі злачынства».
Міліцыя: Згадалі цыганоў, каб грамадзяне былі пільнымі
Пазыцыю пракуратуры праваабаронцу высьветліць не ўдалося. У лісьце, які падпісаў выканаўца абавязкаў кіраўніка абласнога міліцэйскага ведамства Аляксандар Васільеў, адмаўляюцца абвінавачаньні ў распальваньні міжнацыянальнай варажнечы. У допісе сьцьвярджаецца, што згадка ў публікацыі пра этнічную прыналежнасьць затрыманага выкліканая службовай неабходнасьцю «дзеля апэратыўнага апазнаньня зламысьнікаў і выкрыцьця злачынстваў зь іх удзелам, абароны грамадзян і павышэньня іх пільнасьці, а таксама прафіляктыкі правапарушэньняў».
Будынак Упраўленьня ўнутраных спраў Магілёўскага аблвыканкаму
Што да рэкамэндацый Сьледчага камітэту, то праваабаронцу паведамілі, што сайт Упраўленьня не зьяўляецца сродкам масавай інфармацыі, таму парады на яго не распаўсюджваюцца.
Праваабаронца: Блогер — СМІ. Міліцэйскі сайт — не
Аляксандар Буракоў кажа, што будзе дамагацца, каб пракуратура ўсё ж выказалася наконт публікацыі, якую падпісаў афіцыйны прадстаўнік МУС Дзьмітры Ігнатовіч.
«Пракуратура проста сьпіхнула непрыемную для сябе скаргу на ведамства, на якое я скардзіўся. А міліцыя, зразумела, нічога кепскага пра сябе пісаць ня будзе. Таму гэта праблема. Буду скардзіцца, каб пачуць меркаваньне нагляднага органа», — камэнтуе сытуацыю Аляксандар Буракоў.
Тое, што міліцэйскі сайт — ня сродак масавай інфармацыі, зьдзіўляе праваабаронцу.
«Як вядома, цяпер у Беларусі вядзецца паляваньне на блогераў, якіх прылічаюць да СМІ. І тое, што сайт МУС — ня СМІ, на гэтым тле выглядае прынамсі дзіўна. Давядзецца высьвятляць з калегамі, які ж статус мае міліцэйскі сайт. Будзем зьвяртацца ў Міністэрства інфармацыі. Пашлю скаргу ў Генэральную пракуратуру і Міністэрства ўнутраных спраў».