Адкрытае акцыянэрнае таварыства «Гомельскі мясакамбінат» зьвярнулася ў Міністэрства інфармацыі з просьбай прыпыніць дзейнасьць інфармацыйнага парталу «Сильные новости» дзеля абароны дзелавой рэпутацыі прадпрыемства. Пра гэта паведамляе абласная газэта «Гомельская праўда».
Улетку мінулага году праз суполку «Сильные новости» ў сацыяльнай сетцы «ЎКантакце» адзін з чытачоў выклаў здымак кавалка каўбасы, у якім відаць скура і поўсьць. І падпісаў гэтак: «Фотофакт: „Поесть и животинку погладить“: на Гомельском мясокомбинате изготовили колбасу со шкурой и шерстью внутри».
Навіну паглядзелі звыш 20 тысяч наведнікаў сайта. Адрэагавала на яе і ААТ «Гомельскі мясакамбінат». Прадстаўнік прадпрыемства патэлефанаваў у рэдакцыю і заявіў, што такі гатунак каўбасы не вырабляецца з 2015 году. Апроч таго, на каўбасе ня бачна этыкеткі мясакамбінату.
Партал «Сильные новости» дадаў гэтыя зьвесткі ў паведамленьне пра каўбасу. Аднак кіраўніцтва камбінату накіравала ў эканамічны суд Гомельскай вобласьці пазоў да Цэнтру рэгіянальнага разьвіцьця ГДФ — заснавальніка сайта «Сильные новости» — на абарону дзелавой рэпутацыі. У кастрычніку суд яго задаволіў. Зьмешчаныя на сайце зьвесткі пра тое, што ў прадукцыі мясакамбінату ўтрымліваюцца пабочныя прадметы, прызнаныя не адпаведнымі рэчаіснасьці і такімі, якія ганьбяць дзелавую рэпутацыю прадпрыемства. Сайт мусіў надрукаваць абвяржэньне, выбачыцца і кампэнсаваць мясакамбінату судовыя выдаткі ў памеры 420 рублёў.
Апэляцыйную скаргу пакінулі без задавальненьня, і 22 лістапада рашэньне суду набыло юрыдычную моц.
Не дачакаўшыся абвяржэньня на сайце «Сильные новости», мясакамбінат падаў заяву аб прымусовым выкананьні рашэньня суду й прыцягненьні заснавальніка да адміністрацыйнай адказнасьці.
«Абвяржэньне апублікавалі 3 студзеня, — кажа дырэктар Цэнтру рэгіянальнага разьвіцьця ГДФ Пётар Кузьняцоў. — Ня ведаю чаму, але на камбінаце яго не заўважылі — відаць, моцна сьвяткавалі Новы год і прапусьцілі. Юрыдычная служба падала скаргу ў Міністэрства інфармацыі, што мы ня выканалі рашэньня суду. 25 студзеня міністэрства вынесла нам пісьмовае папярэджаньне. Мы накіравалі ў міністэрства тлумачэньне, паінфармавалі, калі было зьмешчана абвяржэньне. І вось цяпер праз афіцыйную абласную газэту даведаліся, што мясакамбінату не падабаецца абвяржэньне. Прадпрыемства патрабуе ўжо, каб дзейнасьць парталу „Сильные новости“ была прыпынена».
Паводле Кузьняцова, у гэтым зацікаўлены ня столькі мясакамбінат, колькі абласная газэта «Гомельская праўда»:
«„Сильные новости“ ў Гомелі цяпер найбольш папулярны рэсурс. Калі за суткі мы маем у сярэднім 40 тысяч наведваньняў, то сайт абласной газэты — усяго 6–7 тысяч. Дапускаю, што гэта і выклікае незадавальненьне», — кажа Пётар Кузьняцоў.
Што да судовых выдаткаў, то, па словах Кузьняцова, Цэнтар рэгіянальнага разьвіцьця ГДФ мае ўжо сёньня перавесьці 420 рублёў на рахунак мясакамбінату.