Прэсавы сакратар МЗС Беларусі Дзьмітры Мірончык запэўніў, што там уважліва сочаць за сытуацыяй і паабяцаў, што як толькі зьявіцца такая інфармацыя, пра яе адразу паведамяць. Нямецкія ўлады яшчэ не паведамілі пра грамадзянства ахвяраў і пацярпелых ад тэракту ў Бэрліне.
У Бэрліне арыштаваны кіроўца грузавіка, які ўрэзаўся ў натоўп людзей на калядным кірмашы. Аўтамабіль праехаў ад 50 да 80 мэтраў па тэрыторыі кірмашу. У выніку ня менш за дванаццаць чалавек загінулі, каля 50 былі параненыя.
У кабіне знаходзіліся два чалавекі. Адзін зь іх, які сядзеў на пасажырскім месцы, знойдзены паліцыяй мёртвым. Кіроўца грузавіка выскачыў з машыны і паспрабаваў уцячы. Адзін чалавек з тых, хто ўбачылі гэта, пачаў перасьледаваць яго і паведамляць каардынаты ў паліцыю. Меркаваны злачынец быў затрыманы паліцыяй прыкладна за два кілямэтры ад месца здарэньня.