ЗША абвінавацілі Расею ў эскаляцыі канфлікту ў Данбасе

Улады ЗША лічаць Расею адказнай за эскаляцыю канфлікту ў Данбасе, дзе ў сераду ўпершыню за доўгі час пачаліся маштабныя баі паміж украінскімі вайскоўцамі і прыхільнікамі самаабвешчанай «ДНР».

Афіцыйны прадстаўнік Дзяржаўнага дэпартамэнту Мэры Харф заявіла, што баі пад Мар’інкай пачаліся з наступу прыхільнікаў ДНР. Непасрэдную адказнасьць за прадухіленьне падобных інцыдэнтаў, на думку Харф, нясе Расея.

У сувязі з гэтым прадстаўнік дзярждэпартамэнту ня выключыла пашырэньня санкцый супраць Расеі. Паводле Харф, такі варыянт разьвіцьця падзей будзе магчымы ў выпадку далейшай эскаляцыі канфлікту.

Украінскія вайскоўцы і кіраўніцтва так званай ДНР абвінавацілі адны адных у парушэньні рэжыму спыненьня агню.