Гомельскіх міліцыянтаў абяцаюць пакараць за журналістаў

Гомельскія міліцыянты, якія перашкаджалі журналістам асьвятляць несанкцыянаваныя акцыі пратэсту сёлета ў ліпені, будуць прыцягнуты да дысцыплінарнай адказнасьці, заявіў начальнік упраўленьня па наглядзе за выкананьнем заканадаўства і законнасьцю прававых актаў Генэральнай пракуратуры Беларусі Павал Радзівонаў.

Ён адмовіўся ўдакладніць імёны супрацоўнікаў, якія будуць пакараныя, але заўважыў, што гэта - "не нейкія абязьлічаныя людзі".

Прадстаўнік пракуратуры пра пакараньне міліцыянтаў

Павел Радзівонаў нагадаў, што органамі Генэральнай пракуратуры і пракуратуры Гомельскай вобласьці былі вынесеныя акты пракурорскага нагляду, зьвязаныя з рэалізацыяй журналістамі іх правоў на асьвятленьне масавых мерапрыемстваў. "Органы пракуратуры запатрабавалі не дапускаць парушэньня правоў журналістаў пры ажыцьцяўленьні імі прафэсійнай дзейнасьці, забясьпечыць з боку супрацоўнікаў органаў унутраных спраў няўхільнае выкананьне заканадаўства аб СМІ, а таксама прыняць належныя меры па недапушчэньні парушэньняў заканадаўства пры вядзеньні адміністрацыйнага працэсу", - заявіў прадстаўнік Генпракуратуры.

Прадстаўленьне Генпракуратуры разгледжана ў поўным аб'ёме Міністэрствам унутраных спраў і прызнана абгрунтаваным.