Намесьніца старшыні “Маладога фронту” Наста Палажанка атрымала ліст з міліцыі Валожынскага раёну аб тым, што адміністрацыйная справа супраць яе спынена.
25 ліпеня ў Івянцы падчас моладзевага каталіцкага фэсту Насту затрымалі дружыньнікі касьцёла. Дзяўчына распаўсюджвала на канцэрце буклеты аб беларускай нацыянальнай сымболіцы. Дружыньнікі здалі дзяўчыну міліцыянтам, якія дзяжурылі на мерапрыемстве.
У торбе міліцыянты знайшлі 22 буклеты. Яны склалі пратакол за распаўсюджваньне друкаванай прадукцыі без выходных дадзеных.
У сваім лісьце міліцыянты паведамілі, што нічога крамольнага ў буклетах яны не знайшлі.
Наста Палажанка мяркуе, што цяпер яна можа забраць зь міліцыі ўсе інфармацыйныя матэрыялы.