Лінкі ўнівэрсальнага доступу

Мінабароны адказала на звароты аб адстаўцы міністра, але патрабаваньне праігнаравала


Уладзімер Макараў, архіўнае фота

На сайце Міністэрства абароны зьявіўся абагулены адказ на «вялікую колькасьць электронных зваротаў па пытаньнях нестатутных адносінаў у арміі аналягічнага зьместу ад розных заяўнікаў», падпісаны прэс-сакратаром міністэрства Ўладзімерам Макаравым.

Якія звароты маюцца на ўвазе і ў чым была іх сутнасьць, Міністэрства ня згадвае. Але падобна, што гаворка вядзецца пра звароты за публічнае расьсьледаваньне сьмерці салдата Аляксандра Коржыча і адстаўку міністра абароны Андрэя Раўкова. Тыя звароты адсылалі з сайта zvarot.by. Мінабароны спачатку залічыла тыя звароты ў спам, а потым нехта часова «паваліў» сайт. Пасьля гэтага подпісы сталі зьбіраць на сайце Petitions.by і адсылаць самастойна па электроннай пошце.

У адказ на звароты Міністэрства згадала свае ранейшыя паведамленьні (спасылкі даюцца на заявы аб расьсьледаваньні і звальненьнях). Мінабароны «яшчэ раз пацьвярджае», што канчатковую прававую ацэнку аб здарэньні з Коржычам дасьць пасьля завяршэньня расьсьледаваньня.

Да вайскоўцаў, якія ўчынілі правапарушэньне, «прымяняюцца меры адказнасьці адпаведна заканадаўству Рэспублікі Беларусь», сьцьвярджае Мінабароны, а па ўсіх фактах злачынстваў, у тым ліку па нестатутных адносінах і вымагальніцтве, «абавязкова пачынаюцца крымінальныя справы». Таксама гаворыцца, што ведамства правярае «паўнату выкананьня сваіх абавязкаў службовымі асобамі, якім прадпісанае падтрыманьне статутнага парадку ў вайсковай частцы».

Але пра патрабаваньне адстаўкі міністра ў адказе на звароты ня згадваецца, хоць закон «Аб зваротах грамадзянаў і юрыдычных асобаў» абавязвае даваць «абгрунтаваныя і матываваныя» адказы з «канкрэтнымі фармулёўкамі» або «рашэньні аб поўнай ці частковай адмове ў задавальненьні зваротаў» з пазначэньнем парадку іх абскарджаньня.

Ваша меркаваньне

Паказаць камэнтары

XS
SM
MD
LG