Лінкі ўнівэрсальнага доступу

Правыя і ўльтраправыя партыі ўзмацнілі пазыцыі па выніках выбараў у Вугоршчыне


Віктар Обран на мітынгу партыі Fidesz абвяшчае аб перамозе на выбарах

Дзейны прэм’ер-міністар Вугоршчыны Віктар Обран абвясьціў аб перамозе сваёй кааліцыі на парлямэнцкіх выбарах у Вугоршчыне, якія прайшлі 8 красавіка. Яўка склала нямалыя па вугорскіх мерках 69%.

Паводле папярэдніх зьвестак, ягоная правая партыя Fidesz у кааліцыі з хрысьціянскімі дэмакратамі KDNP атрымліваюць каля 48,5–48,7% галасоў, што дае ім канстытуцыйную бальшыню: 133 месцы ў 199-мясцовай аднапалатнай Нацыянальнай асамблеі — на два месцы больш, чым мелі раней. Віктар Обран мае пайсьці на чацьвёрты (трэці запар) прэм’ерскі тэрмін.

Напярэдадні выбараў, адзначае BBC, Орбан адмовіўся ад дэбатаў з апанэнтамі і ад гутарак зь незалежнымі СМІ, толькі выступаў на мітынгах уласнай партыі.

Жанчыны ў нацыянальных касьцюмах на выбарах
Жанчыны ў нацыянальных касьцюмах на выбарах

Асноўнай тэмай ягоных выступаў было спыненьне іміграцыі, якую ён называў «іржой, што разьядае Вугоршчыну», сярод абяцаньняў таксама былі скарачэньне падаходнага падатку і далейшы рост эканомікі. Пад ягоным кіраўніцтвам дзяржава ўжо збудавала плот на мяжы з Сэрбіяй і Харватыяй. Орбан таксама выступае супраць далейшай інтэграцыі ў Эўразьвяз, хваліць Уладзіміра Пуціна.

Эўрапейскія ўльтраправыя тым часам віншуюць Орбана зь перамогай — так зрабілі, напрыклад, прадстаўнікі крайне правых партыяў Даніі, Нямеччыны, Францыі...

Крайне правая партыя Jobbik, што спрабуе зьмяніць імідж на бліжэйшы да ўмерана-кансэрватыўнага, займае другое месца з прыблізна 19,54% галасоў і 26 месцамі ў Нацыянальнай асамблеі — гэта крыху горшы вынік за мінулыя выбары ў долі галасоў, але плюс два дэпутацкія мандаты. Лідэр партыі Габор Вона застаўся расчараваным перамогай Fidesz, заявіў аб намеры падаць у адстаўку.

Канкурэнт Орбана кукарэкаў у тэлестудыі. Як у Вугоршчыне праходзіла перадвыбарчая кампанія

Сацыял-дэмакраты MSZP у кааліцыі зь «зялёнымі» лібэраламі Párbeszéd («Дыялёг»), паводле папярэдніх вынікаў, страчваюць 9 месцаў у парлямэнце — 12,33% галасоў і 20 мандатаў.

Яшчэ адна «зялёная» лібэральная партыя LMP мае каля 7% галасоў і 8 месцаў, левацэнтрысты DK маюць каля 5,6% і 9 месцаў. Па адным месцы маюць правацэнтрысты Momentum, лібэральныя цэнтрысты Együtt («Разам») і жартаўлівая партыя «Двухвосты сабака» (MKKP).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG