Афіша
ЦВК павінна разглядзець заяўкі на рэгістрацыю ініцыятыўных груп патэнцыйных кандыдатаў у прэзыдэнты. Паводле Лідзіі Ярмошынай, шанцы быць зарэгістраванымі маюць пяць чалавек.
Аднаго з тых, хто ўжо выбыў з гонкі, так і не патрапіўшы ў ЦВК — Юрыя Шульгана разам з кіраўніком яго групы Паўлам Канавальчыкам будуць судзіць за дробнае хуліганства і зьяўленьне ў грамадзкім месцы ў стане алькагольнага ап’яненьня.
У Грэцыі, як чакаецца, адкрыюцца банкі. Абмежаваньне на зьняцьцё з банкамату 60 эўра на дзень застаецца.
У гісторыі:
1920 — часткі Чырвонай Арміі, якія наступалі на Польшчу, занялі Вільню.
1994 — Аляксандар Лукашэнка пад бел-чырвона-белым сьцягам і на трыбуне з Пагоняй прынёс прысягу ў якасьці першага прэзыдэнта незалежнай Беларусі.
2011 — у Менску і іншых гарадах Беларусі прайшла дзявятая па ліку акцыя маўклівага пратэсту, арганізаваная інтэрнэт-супольнасьцю «Рэвалюцыя праз сацыяльныя сеткі». У сталіцы і іншых гарадах перад пачаткам і ў ходзе акцыяў адбыліся арышты.
У гэты дзень нарадзіліся
1880 — Гальяш Леўчык, паэт, публіцыст, перакладчык, музыка.
1924 — Уладзімер Анічэнка, беларускі мовазнаўца.
1931 — Гай Пікарда, ангельска-францускі адвакат і музыказнаўца, дасьледнік беларускай культуры.
1971 — Зьміцер Вайцюшкевіч, беларускі сьпявак і музыка.
1981 — адзін з заснавальнікаў Маладога Фронту, былы палітвязень Зьміцер Дашкевіч.
У гэты дзень памерлі
1926 — Фэлікс Дзяржынскі, камуністычны дзяяч, кіраўнік ВЧК і ГПУ — карных органаў камуністычнага рэжыму. У гонар Дзяржынскага ў Беларусі дагэтуль застаюцца перайменаванымі два адметныя паселішчы — Койданава пад Менскам і вёска Радзілавічы ў Лельчыцкім раёне.
Цытата на памяць
Тое, што ў Вас пакуль няма судзімасьці, ня Вашая заслуга, а нашая недапрацоўка.
Фэлікс Дзяржынскі