Кэры: Анэксія Крыма зачыніць прастору для дыпляматыі

Чытаць далей

Эскаляцыя канфлікту: На мяжы Крыму абстралялі самалёт украінскіх памежнікаў

На адміністрацыйнай мяжы Аўтаномнай рэспублікі Крым зь зямлі быў абстраляны самалёт дзяржаўнай памежнай службы Ўкраіны. Ніхто не пацярпеў. Як паведамляюць памежнікі, лёгкі самалёт, на борце якога не было ўзбраеньняў, ажыцьцяўляў патруляваньне дзяржаўнай мяжы. Экіпаж зафіксаваў, што страляніна вялася з боку пасёлку Армянск.

Калёна ваеннай тэхнікі без нумароў — верагодна, расейскай — прайшла праз Феадосію і прыбыла ў сталіцу Крыму Сымфэропаль. Акрамя таго, як паведамілі «Украінскай праўдзе» відавочцы, 87 машын выехалі з тэрыторыі палігону Чауды — таксама ў бок Сымфэропаля. У суботу ж у горадзе былі заўважаныя некалькі дзясяткаў грузавікоў КамАЗ і «Урал» , якія — паводле дадзеных памежнай службы — перайшлі мяжу ў прапускным пункце «Крым». Раней з Керчы ў Сымфэропаль прыбылі яшчэ 20 машын, а ў ноч на суботу выгрузіўся дэсантны карабель.

Чытаць далей

Украінскія алігархі заклікаюць уладу і бізнэс аб'яднацца супраць расейскай агрэсіі

Група кампаніяў Group DF мільярдэра Дзьмітрыя Фірташа заклікала ў суботу бізнэс, уладу і грамадзкасьць Украіны аб’яднаць намаганьні, каб разам дзейнічаць для цэласнай і непадзельнай Украіны. «Цяпер ня час для ўзаемных абвінавачваньняў», — гаворыцца ў заяве, якую падпісаў дырэктар-распараднік Group DF Барыс Красьнянскі.

Паводле яго словаў, «калі перад намі паўстае зьнешняя пагроза, любыя ўнутраныя супярэчнасьці ва Ўкраіне, якімі б сур’ёзнымі яны ні здаваліся, маюць адступіць на другі плян, іх трэба адкінуць». «Наша сіла — у адзінстве краіны», — заяўляе Group DF.

Чытаць далей

Ці трэба беларускай апазыцыі і ўладзе аб’яднацца?

Якім будзе беларускае рэха крымскай вайны? Ці памірацца Захад і афіцыйны Менск?

Пра гэта — у перадачы, якую вядзе Аляксандар Лукашук. Удзельнічаюць Юры Дракахруст, Сяргей Навумчык і шэф-рэдактар газэты «Наша ніва» Андрэй Дынько.

Адзін дзень у Крыме. Фотагалерэя

Фотарэпартаж са знаходжаньня у Крымскай Аўтаномнай Рэспубліцы 8 сакавіка 2014 года (аўтар: Мірыям Драгіна).

Прэзыдэнт ЗША абмеркаваў Украіну з сусьветнымі лідэрамі. Іх пазыцыі нязьменныя

Сусьветныя лідэры выказваюць глыбокую заклапочанасьць парушэньнем Расеяй міжнароднага права і пацьвярджаюць падтрымку сувэрэнітэту і тэрытарыяльнай цэласнасьці Украіны.

Пра гэта гаворыцца ў заяве прэс-службы Белага дому пра вынікі тэлефонных размоваў прэзыдэнта ЗША Барака Абамы з прэм’ер-міністрам Вялікабрытаніі Дэвідам Кэмэранам, прэзыдэнтам Францыі Франсуа Аляндам, прэм’ер-міністрам Італіі Матэа Рэнцы.

«Сусьветныя лідэры далі ясна зразумець, што працяг парушэньняў Расеяй міжнароднага права ізалюе яе ад міжнароднай супольнасьці», — гаворыцца ў заяве.

Чытаць далей

У інтэрнэце зьявілася відэа, як у Сымфэропалі сярод дня рабуюць журналістаў

Прыкладна 70 расейскіх грузавікоў уехалі ў Сымфэропаль (відэа)

Прыналежнасьць калёны да расейскіх войскаў выдала паліцэйская машына расейскай ваеннай аўтаінспэкцыі, якая суправаджала грузавікі.

Раней ужо паведамлялася, што ў Сымфэропаль прыбыла калёна з амаль 90 ваенных машынаў у суправаджэньні расейскай аўтаінспэкцыі.

Хадаркоўскі прыляцеў у Кіеў, каб не дапусьціць кровапраліцьця

Былы расейскі алігарх і адзін з самых вядомых расейскіх зьняволеных Міхаіл Хадаркоўскі прыбыў у Кіеў. Пра гэта паведамляе адзін з акаўнтаў Хадаркоўскага ў твітэры. «Маланка. Я ў Кіеве. Прыляцеў», — сказана ў паведамленьні.

МОЛНИЯ я в Киеве прилетел. pic.twitter.com/22N80dPoQr

— Mihail Khodorkovsky (@_Khodorkovsky_) March 8, 2014

У першыя гадзіны візіту ў Кіеў экс-кіраўнік нафтавай карпарацыі «ЮКОС» наведаў кіеўскі Майдан, дзе сфатаграфаваўся ў кампаніі Юрыя Луцэнкі.

Хадаркоўскі раней заявіў, што гатовы накіравацца ва Ўкраіну, каб перадухіліць кровапраліцьцё.

Памёр 83-гадовы абаронца кіеўскага Эўрамайдану

Афіцэр Ваенна-марскіх сілаў СССР у адстаўцы Іван Наканечны памёр, знаходзячыся ў коме, пасьля складанай апэрацыі на галаўным мозгу.

Чытаць далей

АБСЭ: У Крыме жорсткая цэнзура

Інфармацыйнае поле Крыма знаходзіцца пад ціскам з боку самаабвешчанай «улады», на паўвостраве пануе жорсткая цэнзура, заявіла прадстаўнік АБСЕ па пытаньнях свабоды слова Дуня Міятавіч.

Чытаць далей

Украінскія танкі выпраўляцца зь Белай Царквы

Украінскія танкі Т-64, якія знаходзяцца ў вайсковай частцы Белай Царквы, гатовыя да ваенных вучэньняў. Пра гэта паведамляе Еспресо.TV.

Украінскія вайскоўцы распачынаюць маштабныя вучэньні. Тэхніка і вайскоўцы пакідаюць месца сталай дысьлякацыі. Так, у Львове калёна дэсантнікаў на БТРах выправілася ў бок Роўна, а з тэрыторыі 95-й асобнай паветрана-дэсантнай брыгады ў Жытоміры выехалі каля 200 машынаў і 50 БТРаў.

Расейскія вайскоўцы захапілі ўкраінскую памежную заставу

У Крыму ў пасёлку Чарнаморскае расейскія вайскоўцы захапілі ўкраінскую памежную заставу.

Чытаць далей

На беларуска-украінскай мяжы затрымліваюць падазроных ў экстрэмізьме

На беларуска-ўкраінскай мяжы затрыманая група людзей, якія падазраюцца ў намеры ажыцьцяўляць правакацыйныя і баявыя дзеньні на тэрыторыі Ўкраіны.

Чытаць далей

Арганізатар Эўрамайдана ў Крыме Андрэй Шчакун, магчыма, знаходзіцца ў пастарунку міліцыі на чыгуначным вакзале Сімферопаля, піша ЎНІАН.

Прычынай магчымага затрыманьня можы быць тое, што Андрэй Шчакун быў адным з арганізатараў сёньняшняй акцыі, якая павінна была прайсьці ў парку Шаўчэнкі а 12.00.

Тым часам, група актывістаў, якая прыехалі ў пастарунак на вакзале паведаміла ў сацыяльных сетках, што Шчакуна ў аддзяленьні міліцыі няма, паведамляе Еспресо.TV.

«Нашай мабільнай групе паведамілі, што такога арыштаванага ў лінейным участку чыгуначным вакзале Сімферопаля як Андрэй Щекун няма. Працягваем шукаць. Пра тое, што ён у гэтым участку, Андрэй пасьпеў паведаміць калегу па тэлефоне», — гаворыцца ў заяве актывістаў.

У Сімферопалі каля помніку Тарасу Шаўчэнку адбываецца мітынг супраць прызначанага на 16 сакавіка рэфэрэндума. Бярэ ўдзел больш за 200 чалавек, паведамляе ЎНІАН.

Людзі трымаюць дзяржаўныя сьцягі Ўкраіны, сьцягі крымска-татарскага народу, а таксама жоўтыя і блакітныя балёнікі.

У руках удзельнікі мітынга трымаюць плякаты: «Не вайне», «Я не хачу ў «Савок», «Жачыны Крыма за мір», «Крым — гэта Ўкраіна».

Мінакам раздаюць улёткі зь вершамі Тараса Шаўчэнкі.

У Кіраваградзе — шэсьце ў падтрымку адзінасьці Ўкраіны

Каля 100 чалавек, узяўшыся за рукі, прайшлі ўздоўж дарогі да помніка анёлу-абаронцу Ўкраіны.

У Кіраваградзе адбылося шэсьце ў падтрымку тэрытарыяльнай цэласнасьці Ўкраіны і сьвету.

Як перадае УНІАН, акцыя каардынавалася праз сацыяльныя сеткі.

Людзі пачалі зьбірацца да 10.00 на плошчу Герояў Майдану. Большасьць удзельнікаў акцыі — маладыя людзі, якія трымалі ў руках дзяржаўныя сьцягі Ўкраіны. Сымболікі палітычных сіл не было.

Яцанюк наведае ЗША

Прэм’ер-міністар Украіны Арсені Яцанюк на наступным тыдні мае намер наведаць ЗША для кансультацый па ўрэгуляваньні сытуацыі ва Ўкраіне. Пра гэта ён заявіў, адкрываючы пасяджэньне ўрада, перадае УНІАН.

Арсені Яцанюк заявіў cёньня на мітынгу ў кіеўскім парку імя Шаўчэнкі, што Ўкраіна не ўступіць ні сантымэтра сваёй зямлі і будзе вырашаць канфлікт з Расеяй выключна дыпляматычным і палітычным шляхамі.

У Данецку не штурмавалі

Удзельнікі прарасейскага мітынгу ў Данецку выказаліся за правядзеньне рэфэрэндуму пра статус Данецкай вобласьці і фэдэралізацыю Ўкраіны. Як паведамляюць «Новости Донбасса», штурмаваць будынак мітынгоўцы не сталі. Але сарвалі сьцяг Украіны каля будынку і вывесілі замест яго сьцяг Расеі.

Тым часам на Саборнай плошчы ў Данецку праходзіў мітынг за адзінства Ўкраіны.

У Луганску прарасейскія сілы захапілі будынак абласной адміністрацыі, паведамляе выданьне «Восточный вариант». Яны вывесілі афіцыйны сьцяг Беларусі побач са сьцягам Расеі і прымусілі старшыню аблдзяржадміністрацыі Міхаіла Балоцкіх напісаць заяву аб адстаўцы.

Мітынгі прыхільнікаў і праціўнікаў дзеяньняў Расеі ў Крыме праходзяць і ў іншых гарадах на паўднёвым усходзе Ўкраіны.

На Майдане Шаўчэнкаўскае веча