Лінкі ўнівэрсальнага доступу

Чаму Лукашэнка раптам загаварыў пра прэзыдэнцкія выбары?


Аляксандар Лукашэнка, архіўнае фота
Аляксандар Лукашэнка, архіўнае фота

Аляксандар Лукашэнка заклікаў «супакоіцца» тых, хто хоча яго «адшыхтаваць». «Лукашэнку абраў беларускі народ, ён стане прэзыдэнтам, калі ён гэтага захоча», — заявіў кіраўнік Беларусі сёньня ў Маскве на прэсавай канфэрэнцыі па выніках саміту Эўразійскага эканамічнага савету. Чаму Лукашэнка раптам загаварыў пра прэзыдэнцкія выбары? Каму адказваў беларускі кіраўнік, з кім ён вёў завочную палеміку? На гэтыя пытаньні адказвае кіраўнік аналітычных праектаў кампаніі БелаПАН Аляксандар Класкоўскі.

—У Маскве Аляксандар Лукашэнка завочна адказаў тым, хто хоча яго «отстроить». З кім завочна дыскутаваў беларускі кіраўнік, каму ён адказваў, адкуль ідзе гэтая пагроза?

Аляксандар Класкоўскі
Аляксандар Класкоўскі

— Паказальна, што Лукашэнка найперш думае пра выбары, хаця фармальна на саміце гаварылі пра эканоміку, мытныя бар’еры, пастаўкі прадуктаў. Але акурат гэтыя пытаньні зьвязаныя ў ягоным усьведамленьні з наступнай прэзыдэнцкай кампаніяй. Бо чым горай будзе сытуакцыя ў эканоміцы, тым цяжэй будзе весьці гэтую кампанію, і тым болей будзе спакуса ў ягоных праціўнікаў калі не адхіліць яго ад улады, то «отстроить».

У ягоным адказе (хаця фармальна ён згадаў пра ўвесь сьвет) была палеміка зь нейкімі неназванымі расейскімі палітолягамі і журналістамі. Але я думаю, што стрэмкай у Лукашэнкі сядзела недыпляматычнае выказваньне расейскага амбасадара Расеі ў Беларусі Аляксандра Сурыкава, які выказаў сумнеў, што ўвогуле беларускі прэзыдэнт пойдзе на наступныя выбары. І гэта было ўспрынята як такі званочак ад Масквы. Дык вось, прагучаў «наш адказ Чэмбэрлену» — маўляў, нічога ў вас не атрымаецца, усё адно пайду на выбары і выйграю.

— Чаму Лукашэнка вырашыў, што ўжо можна гаварыць пра выбары? Здавалася, дагэтуль ён намагаўся пра выбары шмат не казаць, паказваючы сябе як кіраўніка, які перш за ўсё клапоціцца пра эканоміку. А тут у разгар валютнага крызісу ён узгадвае выбары. Ці гэта наўмысна ці тут проста эмацыйная рэакцыя?

— Я думаю, тут пэўны ланцужок. Выйсьце з эканамічнага крызісу (ці хаця б адцягваньне пэўных наступстваў) палягае праз тое, што Масква ў нейкай форме павінна дапамагчы. А перамовы на гэты конт сёньня, мяркуючы па ўсім, былі цяжкія. Сам расейскі рынак сьціскаецца, рубель таньнее — вось што падкошвае беларускі экспарт. А зноў даваць новыя крэдыты і датацыі Масква, як выглядае, надта ня рвецца.

З гэтага вынікае, што выбарчая задача для Лукашэнкі становіцца ўсё болей вострай. І ён прагаворвае тое, што яго найперш непакоіць. Ён ужо думае пра наступныя выбары, пра тое, што здарыцца праз 11 месяцаў, а можа быць, і хутчэй. Бо на тле сёньняшняй сытуацыі вэрсія пра набліжэньне выбараў не здаецца ўжо такой фантастычнай.

  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода». На беларускай Свабодзе ад 1994 году. Карэспандэнт расейскай Свабоды ў Беларусі.
     

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG