Лінкі ўнівэрсальнага доступу

Судны дзень-2: да 15 сутак арышту. Працягваюцца суды над «недармаедамі»

Ад раніцы 14 сакавіка працягнуліся суды над удзельнікамі «Маршаў недармаедаў». Судзілі прынамсі 13 чалавек у Горадні, прынамсі 3 чалавек у Баранавічах, прынамсі 2 у Берасьці. Людзей каралі штафамі і арыштамі.


Суд над удзельнікамі акцыі недармаедаў і журналістамі ў Воршы. На фота — Вольга Севярынец і Павал Севярынец трымаюцца за рукі
13:22 14.3.2017

Старшыня гарадзенскай Партыі БНФ асуджаны на 13 сутак зьняволеньня

Працягваюць выносіць прысуды ў Горадні. Галіна Ламашэвіч аштрафаваная на 7 базавых велічыняў, Верамеенка Вольга — на 15, Мікалай Салянік — на 8.

Старшыня гарадзенскай арганізацыі Партыі БНФ Вадзім Саранчукоў асуджаны на 13 сутак адміністрацыйнага арышту. Гэты прысуд быў вынесены пад споклічы «Ганьба!».

12:48 14.3.2017

На Лябедзьку завялі справу ў Магілёве

У Магілёве заведзеная адміністратыўная справа на лідэра АГП Анатоля Лябедзьку.

Яго лічаць вінаватым у арганізацыі несанкцыянаванай акцыі ў Магілёве — прагулкі недармаедаў 19 лютага.

Цяпер Лябедзька адбывае 15-суткавы арышт за акцыю ў Маладэчне 10 сакавіка.

12:22 14.3.2017

Віталь Гуляк — 30 базавых, Ірына Давідовіч —15 базавых

У Горадні сталі вядомыя першыя за сёньня прысуды «недармаедам». Сябру партыі БНФ прысудзілі штраф у 30 базавых велічыняў (690 рублёў), сяброўцы АГП Ірыне Давідовіч — 15 базавых велічыняў (345 рублёў). Усяго ў Горадні судзіць маюць прынамсі 11 удзельнікаў «Маршу недармаедаў», што прайшоў 19 лютага.

Віталь Гуляк, архіўнае фота
Віталь Гуляк, архіўнае фота

Ірына Давідовіч, архіўнае фота
Ірына Давідовіч, архіўнае фота

12:00 14.3.2017

Суд у Баранавічах перанесьлі на заўтра

У Баранавічах суд над Яўгенам Жураўскім, Барысам Шырынгай і Міхаілам Стрэльчыкам перанесьлі на 15 сакавіка на 10 гадзінаў. Судзіць будуць разам з бацькам і сынам Чарнавусамі. Судзьдзя — Аксана Копач.

12:00 14.3.2017

Блогера Гарбунова ў Берасьці арыштавалі на 15 сутак

Суд Ленінскага раёну Берасьця засудзіў блогера Дзьмітрыя Гарбунова на 15 сутак арышту за ўдзел у несанкцыянаванай масавай акцыі.

Не дапамагло і тое, што Гарбуноў прад’явіў у судзе рэдакцыйнае заданьне ад «Брестской газеты», паводле якога ён накіроўваўся асьвятляць акцыю. Яго ўзялі пад варту і павезьлі на суткі з залі суду.

11:54 14.3.2017

У Менску затрымалі актывістаў БНФ

У Менску затрыманыя двое сябраў «Моладзі БНФ» Мікіта Краснакуцкі і Мікалай Логвінаў.

Як паведаміў Свабодзе старшыня арганізацыі Юрась Лукашэвіч, абодва затрыманыя знаходзяцца ў Першамайскім РУУС гораду Менску. Прычына іх затрыманьня невядомая, тэлефоны хлопцаў адключаныя.

11:37 14.3.2017

Яшчэ аднаго берасьцейскага блогера засудзілі на 15 сутак

Блогеру Дзьмітрыю Гарбунову Ленінскі раённы суд Берасьця даў 15 сутак арышту за ўдзел у несанкцыянаванай масавай акцыі.

Не дапамагло і тое, што Гарбуноў прадставіў у суд рэдакцыйнае заданьне ад «Брестской газеты», паводле якога ён накіроўваўся асьвятляць акцыю.

Яго ўзялі пад варту і павезьлі на суткі з залі суду.

11:29 14.3.2017

У Магілёве судзяць Алега Аксёнава

За ўдзел у акцыі пратэсту ў Ленінскімпа раённым судзе Магілёва судзяць актывіста БХД Алега Аксёнава. Яго вінавацяць у арганізацыі «Прагулкі недармаедаў», якая адбылася 19 лютага на цэнтральнай вуліцы Ленінскай. У акцыі пратэсту супраць дэкрэту № 3 ўзялі ўдзел блізу 500 чалавек.

Актывіста АГП Ўладзімера Шанцава тым часам выклікалі на 14 гадзін у міліцэйскі пастарунак.

11:24 14.3.2017

Актывіст Грышанаў знаходзіцца ў ізалятары ў Воршы, праводзіцца праверка ў крымінальнай справе

Ігара Грышанава трэці дзень утрымліваюць у аршанскім ізалятары. Гэта Свабодзе пацьвердзіў дзяжурны ізалятару і дадаў, што Ігар Грышанаў падазраецца ва ўчыненьні злачынства, а справу, у якой ён фігуруе, правярае сьледчы Сяргей Трашчанок з раённага ўпраўленьня Сьледчага камітэту.

11:14 14.3.2017

Падсудны пэнсіянэр з Горадні: «Прашу прабачэньня, што галасаваў за Лукашэнку»

У Горадні на судзе за марш недармаедаў пэнсіянэр Мікалай Салянік заявіў на працэсе: «Я не ўхваляю гэты антынародны дэкрэт».

Падсудны цытуе Канстытуцыю, артыкулы, якія гарантуюць правы грамадзян на мірныя сходы і мітынгі:

«Што я парушыў з гэтай Канстытуцыі? Я вінаваты, што выбіраў гэтага чалавека на прэзыдэнта і прашу прабачэньня ва ўсіх, хто тут прысутнічае. Мне крыўдна за краіну. Я ганаруся, што быў на гэтым мітынгу, хоць і трапіў туды выпадкова».

Мікалай Салянік заявіў адвод судзьдзі, але адвод судом ня быў задаволены.

11:07 14.3.2017

У Горадні судзяць Вадзіма Саранчукова

Падсудны кіраўнік гарадзкой арганізацыі БНФ Вадзіма Саранчукоў заяўляе, што пратакол складзены на яго, не адпавядае сапраўднасьці. Ён кажа, што толькі зьбіраў подпісы за адмену дэкрэту, але ня браў удзелу ў акцыі пратэсту.

Вадзім Саранчукоў
Вадзім Саранчукоў

11:00 14.3.2017

Блогер Сяргей Пятрухін завочна атрымаў 15 сутак арышту

Сьведка-міліцыянт у Ленінскім раённым судзе Берасьця распавёў, што Пятрухін з камэрай «правакаваў людзей».

Пятрухін вядзе трансьляцыі і зь мітынгаў, і з суду над сабою. Сёньняшні суд адбываўся ў адсутнасьці самаго Пятрухіна.

11:00 14.3.2017
10:42 14.3.2017

Актывісты на судзе ў Горадні не прызнаюць віну

Сябра АГП Мікалай Салянік заявіў адвод судзьдзі, але адвод судом не быў незадаволены. Салянік у судзе над сабою ў гарадзенскім судзе цытуе Канстытуцыю і пытае ў судзьдзі, ці той прызнае гэты дакумэнт. Салянік быў у ліку тых, на каго склалі пратаколы за ўдзел у «Маршы недармаедаў» 19 лютага ў Горадні.

Галіна Ламашэвіч, на якую таксама склалі пратакол за «Марш недармаедаў», кажа ў судзе, што не прымала ўдзелу раней «ні ў якіх майданах», але прыйшла на плошчу, бо не магла паверыць, што Лукашэнка мог падпісаць такі дэкрэт. Яна не ўяўляе як жыць людзям далей. Яна цытуе словы з тэлевыступу Лукашэнкі пра сабатаж.

10:19 14.3.2017

Гарадзенскія навучэнцы паведамляюць, што іх пужаюць адлічэньнем за ўдзел у «Маршах недармаедаў» — кажуць, нібы ў кожным каледжы і ўнівэрсытэце падпісваюцца пад паперамі аб азнаямленьні з законам «Аб масавых мерапрыемствах».

10:11 14.3.2017

Пачаліся суды ў Горадні

У Горадні за ўдзел у «Маршы недармаедаў» сёньня судзяць не 11, а ўжо 13 чалавек.
Стала вядома пра суды над Яўгенам Браўнам і В. Гузевічам. Суды вядуць тры розныя судзьдзі. Удзельнікаў разьбілі на групы.

10:09 14.3.2017

У Баранавічах бацьку і сына Чарнавусаў будуць судзіць заўтра

15 сакавіка а 14.30 ў Баранавічах будуць судзіць актывіста Міколу Чарнавуса і яго сына Міколу Чарнавуса-малодшага за акцыю 26 лютага. У Баранавічах традыцыйна суды прызначаюць на час акцыяў.

«Марш недармаедаў» у Віцебску, Бабруйску, Баранавічах і Берасьці
пачакайце

No media source currently available

0:00 0:01:39 0:00

09:56 14.3.2017

У Магілёве затрымалі каардынатара акцыі недармаедаў

Алег Аксёнаў, архіўнае фота
Алег Аксёнаў, архіўнае фота

У Магілёве ў суправаджэньні чатырох міліцыянтаў прывезьлі ў Ленінскі аддзел міліцыі Магілёва каардынатара камітэту стварэньня партыі «Беларуская хрысьціянская дэмакратыя» Алега Аксёнава.

«Аксёнава прывезьлі», — пацьвердзілі Свабодзе ў пастарунку.

Актывіст адмовіўся зранку бяз позвы ехаць у Ленінскі раённы аддзел міліцыі, і яму яе прывезьлі. Паводле Алега Аксёнава, гвалту над ім не было. «Прывезьлі позву, сказалі зьбірацца. Цяпер вядуць у пастарунак», — паведаміў актывіст Свабодзе.

Яго вінавацяць у арганізацыі «Прагулкі недармаедаў», якая адбылася 19 лютага на цэнтральнай вуліцы Ленінскай. У акцыі пратэсту супраць дэкрэту № 3 ўзялі ўдзел блізу 500 чалавек.

09:51 14.3.2017

У Воршы шукаюць затрыманага актывіста Грышанава

Ігар Грышанаў, архіўнае фота
Ігар Грышанаў, архіўнае фота

Дагэтуль застаецца невядомым лёс аршанскага актывіста Ігара Грышанава, якіга міліцыя затрымала напярэдадні «Маршу недармаедаў» у Воршы.

У Воршы ў яго няма блізкіх сваякоў, акрамя старэнькай маці, а сябры з гарадзкога дэмакратычнага асяродку ведаюць толькі тое, што цяпер актывіст знаходзіцца пад вартай.

12 сакавіка каля 11-й гадзіны яго затрымалі ў машыне на аўтазапраўцы і павезьлі ў міліцыю. (чытаць цалкам)

Загрузіць яшчэ

Глядзець камэнтары (5)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG