За апошнія дні былі затрыманыя, аштрафаваныя або выкліканыя на суд больш за 100 «недармаедаў». На ўчорашніх судах давалі штрафы і арышты да 15 сутак. За кратамі на «сутках» лідэры АГП, БХД і руху «За свабоду», штрафы за асьвятленьне акцыяў атрымалі журналісты Свабоды і тэлеканалу «Белсат».
Сёньня ў Горадні а 10-й гадзіне пачынаюцца суды над 11-цю ўдзельнікамі «Марша недармаедаў», які адбыўся 19 лютага. Позвы ў суд атрымалі Вадзім Саранчукоў, Ежы Грыгенчы, Аляксандар Абуховіч, Сяргей Верамеенка, Вольга Верамеенка, Анатоль Мышкевіч, Мікалай Салянік, Ірына Давідовіч, Віталь Гуляк, Галіна Ламашэвіч і Антон Войцехаў.
На Берасьцейшчыне сёньня 5 судоў за акцыі недармаедаў
Працяг суду над блогерамі Сяргеем Пятрухіным і Дзьмітрыем Гарбуновым пачнецца а 9.30 у Ленінскім судзе Берасьця. Напярэдадні суд перанёс разгляд іхнай справы, бо яны запатрабавалі заключэньня дамоваў з адвакатамі.
У Баранавічах адбудуцца суды над трыма мужчынамі, якія выступілі падчас мітынгу на мясцовым Маршы недармаедаў 26 лютага. Пакуль вядомыя імёны толькі дзьвюх з трох асобаў, якіх будуць судзіць. Гэта Міхаіл Стрэльчык і Барыс Шырынга. Суды над імі пачнуцца аб 11.30.
Судны дзень-2: працягваюцца суды над «недармаедамі». Жывы блог #судзяць https://t.co/7M0ICJYYPK https://t.co/4WL4xiROMU
— Радыё Свабода (@svaboda) 14.3.2017
У Воршы шукаюць затрыманага актывіста Грышанава
Дагэтуль застаецца невядомым лёс аршанскага актывіста Ігара Грышанава, якіга міліцыя затрымала напярэдадні «Маршу недармаедаў» у Воршы.
У Воршы ў яго няма блізкіх сваякоў, акрамя старэнькай маці, а сябры з гарадзкога дэмакратычнага асяродку ведаюць толькі тое, што цяпер актывіст знаходзіцца пад вартай.
12 сакавіка каля 11-й гадзіны яго затрымалі ў машыне на аўтазапраўцы і павезьлі ў міліцыю. (чытаць цалкам)
У Магілёве затрымалі каардынатара акцыі недармаедаў
У Магілёве ў суправаджэньні чатырох міліцыянтаў прывезьлі ў Ленінскі аддзел міліцыі Магілёва каардынатара камітэту стварэньня партыі «Беларуская хрысьціянская дэмакратыя» Алега Аксёнава.
«Аксёнава прывезьлі», — пацьвердзілі Свабодзе ў пастарунку.
Актывіст адмовіўся зранку бяз позвы ехаць у Ленінскі раённы аддзел міліцыі, і яму яе прывезьлі. Паводле Алега Аксёнава, гвалту над ім не было. «Прывезьлі позву, сказалі зьбірацца. Цяпер вядуць у пастарунак», — паведаміў актывіст Свабодзе.
Яго вінавацяць у арганізацыі «Прагулкі недармаедаў», якая адбылася 19 лютага на цэнтральнай вуліцы Ленінскай. У акцыі пратэсту супраць дэкрэту № 3 ўзялі ўдзел блізу 500 чалавек.
У Баранавічах бацьку і сына Чарнавусаў будуць судзіць заўтра
15 сакавіка а 14.30 ў Баранавічах будуць судзіць актывіста Міколу Чарнавуса і яго сына Міколу Чарнавуса-малодшага за акцыю 26 лютага. У Баранавічах традыцыйна суды прызначаюць на час акцыяў.
Пачаліся суды ў Горадні
У Горадні за ўдзел у «Маршы недармаедаў» сёньня судзяць не 11, а ўжо 13 чалавек.
Стала вядома пра суды над Яўгенам Браўнам і В. Гузевічам. Суды вядуць тры розныя судзьдзі. Удзельнікаў разьбілі на групы.
Гарадзенскія навучэнцы паведамляюць, што іх пужаюць адлічэньнем за ўдзел у «Маршах недармаедаў» — кажуць, нібы ў кожным каледжы і ўнівэрсытэце падпісваюцца пад паперамі аб азнаямленьні з законам «Аб масавых мерапрыемствах».
Актывісты на судзе ў Горадні не прызнаюць віну
Сябра АГП Мікалай Салянік заявіў адвод судзьдзі, але адвод судом не быў незадаволены. Салянік у судзе над сабою ў гарадзенскім судзе цытуе Канстытуцыю і пытае ў судзьдзі, ці той прызнае гэты дакумэнт. Салянік быў у ліку тых, на каго склалі пратаколы за ўдзел у «Маршы недармаедаў» 19 лютага ў Горадні.
Галіна Ламашэвіч, на якую таксама склалі пратакол за «Марш недармаедаў», кажа ў судзе, што не прымала ўдзелу раней «ні ў якіх майданах», але прыйшла на плошчу, бо не магла паверыць, што Лукашэнка мог падпісаць такі дэкрэт. Яна не ўяўляе як жыць людзям далей. Яна цытуе словы з тэлевыступу Лукашэнкі пра сабатаж.
У Бабруйску працяг судоў над удзельнікамі маршу недармаедаў
Блогер Сяргей Пятрухін завочна атрымаў 15 сутак арышту
Сьведка-міліцыянт у Ленінскім раённым судзе Берасьця распавёў, што Пятрухін з камэрай «правакаваў людзей».
Пятрухін вядзе трансьляцыі і зь мітынгаў, і з суду над сабою. Сёньняшні суд адбываўся ў адсутнасьці самаго Пятрухіна.
ТЭРМІНОВА! Блогер Сяргей Пятрухін завочна атрымаў 15 сутак арышту #судзяць https://t.co/7M0ICJYYPK https://t.co/LJH975olI0
— Радыё Свабода (@svaboda) 14.3.2017
У Горадні судзяць Вадзіма Саранчукова
Падсудны кіраўнік гарадзкой арганізацыі БНФ Вадзіма Саранчукоў заяўляе, што пратакол складзены на яго, не адпавядае сапраўднасьці. Ён кажа, што толькі зьбіраў подпісы за адмену дэкрэту, але ня браў удзелу ў акцыі пратэсту.
Падсудны пэнсіянэр з Горадні: «Прашу прабачэньня, што галасаваў за Лукашэнку»
У Горадні на судзе за марш недармаедаў пэнсіянэр Мікалай Салянік заявіў на працэсе: «Я не ўхваляю гэты антынародны дэкрэт».
Падсудны цытуе Канстытуцыю, артыкулы, якія гарантуюць правы грамадзян на мірныя сходы і мітынгі:
«Што я парушыў з гэтай Канстытуцыі? Я вінаваты, што выбіраў гэтага чалавека на прэзыдэнта і прашу прабачэньня ва ўсіх, хто тут прысутнічае. Мне крыўдна за краіну. Я ганаруся, што быў на гэтым мітынгу, хоць і трапіў туды выпадкова».
Мікалай Салянік заявіў адвод судзьдзі, але адвод судом ня быў задаволены.
Актывіст Грышанаў знаходзіцца ў ізалятары ў Воршы, праводзіцца праверка ў крымінальнай справе
Ігара Грышанава трэці дзень утрымліваюць у аршанскім ізалятары. Гэта Свабодзе пацьвердзіў дзяжурны ізалятару і дадаў, што Ігар Грышанаў падазраецца ва ўчыненьні злачынства, а справу, у якой ён фігуруе, правярае сьледчы Сяргей Трашчанок з раённага ўпраўленьня Сьледчага камітэту.
У Магілёве судзяць Алега Аксёнава
За ўдзел у акцыі пратэсту ў Ленінскімпа раённым судзе Магілёва судзяць актывіста БХД Алега Аксёнава. Яго вінавацяць у арганізацыі «Прагулкі недармаедаў», якая адбылася 19 лютага на цэнтральнай вуліцы Ленінскай. У акцыі пратэсту супраць дэкрэту № 3 ўзялі ўдзел блізу 500 чалавек.
Актывіста АГП Ўладзімера Шанцава тым часам выклікалі на 14 гадзін у міліцэйскі пастарунак.
Яшчэ аднаго берасьцейскага блогера засудзілі на 15 сутак
Блогеру Дзьмітрыю Гарбунову Ленінскі раённы суд Берасьця даў 15 сутак арышту за ўдзел у несанкцыянаванай масавай акцыі.
Не дапамагло і тое, што Гарбуноў прадставіў у суд рэдакцыйнае заданьне ад «Брестской газеты», паводле якога ён накіроўваўся асьвятляць акцыю.
Яго ўзялі пад варту і павезьлі на суткі з залі суду.
У Менску затрымалі актывістаў БНФ
У Менску затрыманыя двое сябраў «Моладзі БНФ» Мікіта Краснакуцкі і Мікалай Логвінаў.
Як паведаміў Свабодзе старшыня арганізацыі Юрась Лукашэвіч, абодва затрыманыя знаходзяцца ў Першамайскім РУУС гораду Менску. Прычына іх затрыманьня невядомая, тэлефоны хлопцаў адключаныя.
Блогера Гарбунова ў Берасьці арыштавалі на 15 сутак
Суд Ленінскага раёну Берасьця засудзіў блогера Дзьмітрыя Гарбунова на 15 сутак арышту за ўдзел у несанкцыянаванай масавай акцыі.
Не дапамагло і тое, што Гарбуноў прад’явіў у судзе рэдакцыйнае заданьне ад «Брестской газеты», паводле якога ён накіроўваўся асьвятляць акцыю. Яго ўзялі пад варту і павезьлі на суткі з залі суду.