Лінкі ўнівэрсальнага доступу

Што будуць абмяркоўваць на сустрэчы кантактнай групы па Ўкраіне?


Сытуацыя на ўсходзе Ўкраіны
Сытуацыя на ўсходзе Ўкраіны

Спыненьне агню, адвод цяжкай тэхнікі, абмен палоннымі, дастаўка гуманітарных грузаў — такія асноўныя пытаньні, якія плянуюць абмеркаваць сёньня ў Менску на сустрэчы трохбаковай кантактнай групы Украіна — Расея — АБСЭ.

Як паведаміў прэс-сакратар МЗС Беларусі Дзьмітры Мірончык, пачатак сустрэчы заплянаваны на 15 гадзін. Паводле рашэньня прадстаўнікоў кантактнай групы, яна пройдзе ў закрытым для журналістаў рэжыме.

Прадстаўніца АБСЭ Хадзі Тальявіні раней заявіла, што будуць абмяркоўвацца чатыры блёкі пытаньняў. Гэта спыненьне агню з усіх бакоў, адвод цяжкай тэхнікі, абмен палоннымі і дастаўка гуманітарных грузаў у падкантрольныя сэпаратыстам тэрыторыі — паведамляе «Інтэрфакс».

Прадстаўнікі Кіева неаднаразова заяўлялі, што настойваюць на выкананьні адпаведных менскіх дамоўленасьцяў ад 5 і 18 верасьня.

Паводле інфармацыі «Інтэрфаксу», інтарэсы так званай Луганскай народнай рэспублікі ў Менску будзе прадстаўляць Владислав Дейнего. Ад так званай Данецкай народнай рэспублікі ў Менск накіраваны Дзяніс Пушылін.

Паводле некаторых зьвестак, прадстаўнікі сэпаратысцкіх фармаваньняў будуць уздымаць на сустрэчы пытаньне пра адмысловы статус Данбасу і закон аб амністыі.

Сустрэча трохбаковай кантактнай групы ў Менску пераносілася некалькі разоў. Дамоўленасьць пра яе правядзеньне 24 і 26 сьнежня была дасягнутая падчас тэлефонных размоў паміж Уладзімерам Пуціным, Ангелай Мэркель, Франсуа Аляндам і Пятром Парашэнкам 22 сьнежня.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG