Лінкі ўнівэрсальнага доступу

Сіўчыка аштрафавалі на 10,5 мільёна рублёў. Судовы канвэер працягваецца

абноўлена

Уладзімер Някляеў, Вячаслаў Сіўчык, Мікалай Статкевіч, Станіслаў Шушкевіч, Генадзь Фядыніч на ўстаноўчым сходзе Беларускага нацыянальнага кангрэсу
Уладзімер Някляеў, Вячаслаў Сіўчык, Мікалай Статкевіч, Станіслаў Шушкевіч, Генадзь Фядыніч на ўстаноўчым сходзе Беларускага нацыянальнага кангрэсу

2 чэрвеня ў Цэнтральным судзе Менску разглядалася адміністрацыйная справа, заведзеная супраць Вячаслава Сіўчыка.

Яго абвінавацілі ва ўдзеле ў несанкцыянаваным масавым мерапрыемстве — устаноўчым сходзе Беларускага нацыянальнага кангрэсу, які прайшоў у Менску 15 траўня.

Позву ў суд Вячаславу Сіўчыку ўручылі ўчора раніцай праз адваката. Яна суправаджалася паперай аб прымусовым прыводзе актывіста. Вячаслаў Сіўчык зьдзіўлены рашэньнем судзьдзі наконт прымусовай яўкі і сёньня сам прыйшоў у суд. Судзьдзя пакараў яго штрафам у 50 базавых велічынь (10,5 мільёна рублёў).

Вячаслаў Сіўчык распавёў карэспандэнту Свабоды, што пасьля вяртаньня ў Беларусь яго судзілі ўжо больш за 20 разоў:

«Я практычна апошні месяц не выходжу з суду Цэнтральнага раёну, бо мяне там судзяць і судзяць.

Сёньня суд праходзіў спакойна, бо былі дыпляматы, журналісты, мяне прыйшлі падтрымаць мае калегі. На жаль, судзьдзя не задаволіў ніводнага майго хадайніцтва. Я лічу, што падставаў для пастановы аб маім прымусовым прыводзе не было. Таму я запатрабаваў адводу судзьдзі. Гэтае хадайніцтва не было задаволена. Тады мой адвакат папрасіў абʼяднаць усе справы, якія заведзеныя супраць мяне ў Цэнтральным судзе, бо мне ўручылі позву яшчэ і на 6 чэрвеня. Але і гэтае хадайніцтва было адхілена.

Судзьдзя сказаў, што ў гэты дзень няма слуханьняў справы Сіўчыка за падзеі 15 траўня. Я гэтым задаволены. Усё астатняе было зразумела, бо незалежнага суду ў Беларусі няма».

Таксама штрафам у 50 базавых велічынь пакараны Ўладзь Яроменак за ўдзел ва ўстаноўчым сходзе Беларускага нацыянальнага кангрэсу.

У судзе Цэнтральнага раёну Менску сёньня разглядалася і адміністрацыйная справа Мікалая Аўтуховіча, але слуханьні перанесьлі на 7 чэрвеня.

Старшыня незалежнага прафсаюзу РЭП Генадзь Фядыніч пакараны штрафам 6,3 мільёна рублёў (30 базавых велічынь) за ўдзел у кангрэсе. Ён сказаў карэспандэнту Свабоды:

«Мяне больш турбуе ня так сам той суд ці судзьдзя, як ілжывыя паказаньні міліцыянтаў. Мы і ў судзе задалі пытаньне: як нам рэалізаваць гарантаваныя канстытуцыяй правы? Судзьдзя маўчыць. Проста расьпісалі ўсім штрафы, дый усё. Відаць, ёсьць загад зьверху».

Сёньня павінны судзіць і Мікалая Статкевіча. Аднак палітык у суд не прыйшоў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG