Лінкі ўнівэрсальнага доступу

Ужо сёньня: у Менску пакажуць мультфільмы па-беларуску


Поўная заля гледачоў падчас беларускамоўных сэансаў у кінатэатры «Перамога», лістапад 2016 году

Падзеі 17 сакавіка ў беларускай і сусьветнай гісторыі, а таксама афіша на сёньня.

Афіша

«Беларускія ўікэнды» ў Менску

Аб’яднаньне «Кінаконг» і кінатэатар «Масква» правядуць новыя «Беларускія ўікэнды» — сэрыю паказаў кіно, агучанага па-беларуску. На 17–18 сакавіка заплянаваны мультфільм «Таямніца Келза» — казачная гісторыя, заснаваная на рэальных падзеях 9 стагодзьдзя ў Ірляндыі.

Кінатэатар «Масква» (праспэкт Пераможцаў, 13 ).
Пачатак у 17:00.
Квіткі каштуюць 5 рублёў.

Прэзэнтацыя зборніка Яўгена Бясчаснага «Стой!»

Напярэдадні Сусьветнага дня паэзіі, які адзначаецца 21 сакавіка, Літаратурны музэй Максіма Багдановіча запрашае на прэзэнтацыю дэбютнага паэтычнага зборніка Яўгена Бясчаснага «Стой!», які выйшаў у лютым.

Менск, музэй Максіма Багдановіча (вул. М.Багдановіча, 7а).
Пачатак у 17:30.
Уваход вольны.

Дзень у гісторыі

1597 — Жыгімонт ІІІ Ваза надаў Віцебску магдэбурскае права. Горад атрымаў герб: у блакітным полі выява Хрыста, пад якой чырвоны меч.

Герб Віцебску
Герб Віцебску

1948 — Бэльгія, Вялікая Брытанія, Люксэмбург, Нідэрлянды і Францыя падпісалі Брусэльскі пакт. Так быў утвораны абарончы Заходнеэўрапейскі саюз, які паклаў пачатак НАТО.

1983 — у Купалаўскім парку ў Менску ўпершыню было наладжана Гуканьне вясны. У наступныя гады сьвяткаваньне стала штогадовым і масавым, яно давала магчымасьць зьбірацца разам патрыятычна настроеным людзям.

Гуканьне вясны, 1983 год
Гуканьне вясны, 1983 год

1991 — у СССР прайшоў рэфэрэндум аб праекце новага саюзнага пагадненьня. У Беларусі за захаваньне Савецкага Саюзу выказаліся 82,7% выбарнікаў, гэта быў самы вялікі адсотак пасьля Сярэдняй Азіі.

2012 — Беларускае дзяржаўнае тэлебачаньне паведаміла пра расстрэл Дзьмітрыя Канавалава і Ўладзіслава Кавалёва, меркаваных выканаўцаў тэракту ў менскім мэтро.

У гэты дзень нарадзіліся

1789 — Вінцэнт Бучынскі, прафэсар філязофіі Полацкай езуіцкай акадэміі, заснавальнік і рэдактар першага ў Беларусі літаратурна-навуковага часопіса, які называўся «Полацкі штомесячнік» і пачаў выходзіць у 1818 годзе.

1900 — Яфрэм Карнейчык, беларускі гісторык.

1948 — Ўільям Гібсан, канадзкі пісьменьнік, пачынальнік літаратурнага жанру «кібэрпанк».

У памяці

1951 — памёр беларускі паэт і перакладчык Альберт Паўловіч. У менскім доме Паўловіча на пачатку ХХ стагодзьдзя быў літаратурны салён, дзе зьбіраліся беларускія пісьменьнікі.

1956 — памерла Ірэн Жаліё-Кюры, францускі фізык і хімік, ляўрэатка Нобэлеўскай прэміі па хіміі.

XS
SM
MD
LG