Актывісты Вольга Мікалайчык, Алесь Макаеў, Яўген Батура, Максім Вінярскі і Мікола Колас правялі ноч пасьля затрыманьня ў турме на Акрэсьціна.
Учора ўвечары ўдзельнікі акцыі пасьпелі ўскласьці кветкі, памаліцца, прасьпяваць гімн Украіны і «Магутны Божа». Вольга Мікалайчык разгарнула вялікі партрэт Міхала Жызьнеўскага. Усё здымалі на камэру людзі ў цывільным. Пасьля заканчэньня акцыі ўсіх затрымалі. Цягам трох гадзінаў удзельнікаў акцыі трымалі тварам да сцяны. Ніне Багінскай не дазвалялі прысесьці.
Вызваленыя актывісты папрасілі прадстаўнікоў амбасады Ўкраіны звярнуць ўвагу на тое, что ў аўтобусе ў кірунку РУУСа прадстаўнікі сілавых структураў Беларусі вельмі зьдзекліва, ганебна, у абразьлівай форме выказваліся пра Ўкраіну і ўкраінцаў.
Як паведаміла Тацьцяна Ўласенка, прыкладна а 0:30 вызвалілі чатырох чалавек: Ніну Багінскую, Зьмітра Захарэвіча, Юрыя Ваўчка, Валерыю Чарнаморцаву.
