Як піша выданьне «Люстэрка», цяпер гэтая прадукцыя недаступная для замовы, аднак у кампаніі разьлічваюць як мага хутчэй аднавіць продажы, расказала ў Threads дырэктарка маркетынгу фірмы Вольга Безвадзіцкая.
«На складах у Электрасталі і Катоўску знаходзілася каля 30% усяго таварнага запасу касмэтычнай кампаніі Modum. Цяпер гэты асартымэнт недаступны для замовы, у прыярытэце ня толькі ацэнка стратаў, але і максымальна хуткае аднаўленьне даступнасьці прадукцыі для пакупнікоў», — цытуе прадстаўніцу Modum крыніца «Люстэрка».
Паводле Вольгі Безвадзіцкай, кампанія загадзя разьмеркавала прадукцыю паміж некалькімі расейскімі складамі Wildberries, таму вялікая частка асартымэнту па-ранейшаму прадаецца ў звычайным рэжыме.
Акрамя таго, некаторыя тавары ўжо перавялі на іншую схему продажаў.
«Таксама мы апэратыўна перавялі частку пазыцыяў на схему FBS (дастаўка з складу прадаўца), гэта дае магчымасьць аднавіць продажы, не чакаючы аднаўленьня працы пацярпелых лягістычных цэнтраў», — дадала яна.
Адзін з камэнтатараў пацікавіўся, ці дапускаюць у кампаніі, што найбліжэйшымі тыднямі могуць пацярпець іншыя склады Wildberries, і спытаў, што ў такім выпадку плянуюць рабіць. На гэта прадстаўніца Modum адказала:
«Пакуль ня думалі пра гэта».
Яшчэ адзін карыстальнік спытаў, ці будзе кампэнсаваная шкода кампаніі. У адказ Вольга паведаміла, што з гэтым «разьбіраюцца юрысты».
Пацярпелыя ад удараў
Ноччу 18 ліпеня пад удар дронаў трапілі лягістычныя комплексы Wildberries у Катоўску (Тамбоўская вобласьць Расеі) і Электрасталі (Маскоўская вобласьць). На першым аб’екце загінулі сем чалавек, яшчэ як мінімум 25 атрымалі раненьні.
У Электрасталі пацярпелі 37 чалавек, адзін зь іх памёр у шпіталі. Восем пацярпелых у цяжкім стане, астатнія ў стане сярэдняй ступені цяжкасьці.
Расейскія войскі рэгулярна атакуюць украінскія гарады і цывільную інфраструктуру ракетамі і дронамі, Уладзімір Пуцін адхіліў прапанову Кіева спыніць удары ўглыб дзьвюх краін і баі на лініі фронту.
Ці будзе кампэнсацыя
Абодва склады выкарыстоўвалі многія беларускія прадаўцы. Некаторыя зь іх ужо паведамілі, што страцілі тавары і чакаюць інфармацыі пра магчымае кампэнсаваньне.
Расейскія СМІ пісалі, што яшчэ ў пачатку ліпеня ўладальнік маркетплэйсу Wildberries зьмяніў умовы афэрты, зьняўшы зь сябе адказнасьць за тавары, зьнішчаныя або пашкоджаныя ў выніку баявых дзеяньняў, атак бесьпілётнікаў, абстрэлаў і выбухаў. Аднак прадпрымальнікі зь Беларусі адзначалі, што для іх дзейнічае іншае пагадненьне, у якім ня згадваліся БПЛА, аднак у якасьці вынятку былі пазначаныя «абставіны непераадольнай сілы».
Новыя атакі на Wildberries
У ноч на 22 ліпеня ўкраінскія дроны атакавалі лягістычныя цэнтры Wildberries у Краснадары і Нявіннамыску ў Стаўрапольскім краі Расеі, на іх тэрыторыі пачаліся маштабныя пажары.
Відавочцы апублікавалі відэа маштабнага пажару на нежылым аб’екце ў Нявіннамыску Стаўрапольскага краю. Канал Exilenova+ сьцьвярджае, што там гарыць склад Wildberries.
Зяленскі патлумачыў удары па лягістычных цэнтрах і заклікаў вярнуцца да дыпляматыі
Уладзімір Зяленскі заявіў, што «22 ліпеня далёкабойныя санкцыі Ўкраіны пасьпяхова паразілі важныя цэлі ў Краснадарскім і Стаўрапольскім краях — лягістычныя цэнтры, якія займаюцца забесьпячэньнем расейскай арміі кампанэнтамі бесьпілётнікаў, навігацыйным абсталяваньнем і тэхнікай, а таксама чарговыя нафтабазы».
Паводле Зяленскага, у водах Чорнага і Азоўскага мораў зьнішчаныя танкер і чатыры сухагрузы расейскага ценевага флёту:
«Дзякуем усім нашым салдатам Арміі абароны Ўкраіны за гэтыя вынікі. Мы справядліва вяртаем вайну дадому — у Расею. Патрэбен мір, і Ўкраіна дала расейскаму боку ўсе прапановы. Мы павінны прымусіць яго зьвярнуцца да дыпляматыі».
Прэзыдэнт Украіны Ўладзімір Зяленскі пасьля ўдараў 18 ліпеня заявіў, што склады выкарыстоўвалі для пастаўкі дэталяў дронаў, і назваў атакі адказам на расейскія ўдары па цывільнай інфраструктуры Ўкраіны.
«Мы справядліва адказваем на кожны расейскі ўдар на нашы гарады і грамады. Гэтую вайну трэба завяршаць, і гэта магчыма толькі праз узмацненьне ціску на адзіную прычыну гэтай вайны — Расею»,— заявіў Зяленскі.
У Расеі распачалі справу аб тэрарыстычным акце.
- Расейскія войскі рэгулярна атакуюць украінскія гарады і цывільную інфраструктуру ракетамі, ударнымі бесьпілётнікамі, кіраванымі авіябомбамі, іншымі відамі ўзбраеньняў.
- Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расейскай Фэдэрацыі і падкрэсьліваюць, што яны мэтанакіраваныя.
- Абстрэл сыстэмаў жыцьцезабесьпячэньня і ўстановаў аховы здароўя з мэтай пазбавіць людзей электрычнасьці, цяпла, забесьпячэньня вадой, сувязі, мэдычнай дапамогі і іншых неабходных для жыцьця ўмоваў — прыкмета генацыдных дзеяньняў.
- Крэмль адмаўляе, што расейская армія падчас паўнамаштабнай вайны наносіць мэтанакіраваныя ўдары па цывільнай інфраструктуры ўкраінскіх гарадоў і вёсак, забіваючы мірных жыхароў і разбураючы лякарні, школы, дзіцячыя садкі, аб’екты энэрга- і водазабесьпячэньня.
