Аляксандар Лукашэнка даручыў прапрацаваць магчымасьць далучэньня да ААТ «Савушкин продукт» некаторых адсталых сельгаспрадпрыемстваў Берасьцейскай вобласьці. Гэтае пытаньне абмяркоўвалася 11 жніўня, калі Лукашэнка наведаў пасьпяховую кампанію — вытворцу малочных прадуктаў.
Сярод іншага адзначалася, што такое рашэньне «магло б пайсьці на карысьць і бізнэсу, і дзяржаве». Па лёгіцы ўлады, у выніку такіх пераўтварэньняў зьявіцца магчымасьць больш эфэктыўна выкарыстоўваць сыравіну, павялічваць заробную плату на далучаных прадпрыемствах і падатковыя паступленьні ў бюджэт.
«Я лабірую павелічэньне паступленьняў у дзяржаўны бюджэт, — сказаў Лукашэнка. — Вядома, і яму (ААТ „Савушкин продукт“) павінна быць выгада. У яго адна праблема — сыравіна. Калі б ад гэтай сыравіны, якую я б яму аддаў, дзяржава атрымала б больш, я б не задумваючыся гэта зрабіў. Якая розьніца, прыватнік ці не? Так, ён атрымае больш, ну і добра. Але ўсё роўна эфэкт ад тоны малака вышэйшы будзе, чым цяпер».
Лукашэнка даручыў да 1 студзеня наступнага году прапрацаваць пытаньні і падлічыць, які эфэкт можа атрымаць дзяржава пасьля прыняцьця адпаведнага рашэньня. Ён таксама заклікаў беларускіх чыноўнікаў сьмялей дзейнічаць пры ажыцьцяўленьні падобных праектаў і пазбаўляцца ад «савецкіх забабонаў».
Пасьля гэтага Лукашэнка ўручыў калектыву прадпрыемства ганаровы дзяржаўны сьцяг — «За асаблівыя дасягненьні ў гаспадарчым разьвіцьці».
