Лінкі ўнівэрсальнага доступу

Лукашэнка ўручыў «Савушкиному продукту», які байкатуе беларускую мову, ганаровы дзяржаўны сьцяг


Аляксандар Лукашэнка ў час наведваньня ААТ "Савушкін прадукт", 11 жніўня 2017 году

Аляксандар Лукашэнка 11 жніўня ўручыў калектыву ААТ «Савушкин продукт» ганаровы дзяржаўны сьцяг Рэспублікі Беларусь за асаблівыя дасягненьні ў гаспадарчым разьвіцьці.

Як перадае БЕЛТА, Лукашэнка назваў гэтую падзею яшчэ адной яркай старонкай у гісторыі прадпрыемства.

«Гэта ня толькі знак высокага прызнаньня заслуг усяго вашага калектыву, але і паказчык той народнай любові, якую змог заваяваць „Савушкин продукт“. Прадукцыя прадпрыемства сёньня на стале практычна ў кожнай сям’і», — сказаў Аляксандар Лукашэнка.

На прадпрыемстве ён наведаў участкі перапрацоўкі сыроваткі і вытворчасьці тварагоў.

На пачатку 2017 году «Савушкин продукт» заявіў, што прынцыпова ня будзе дубляваць на ўпакоўках назвы і склад прадуктаў па-беларуску — таму што гэта нібыта зробіць прадукцыю значна даражэйшай. Пасьля на «Савушкин продукт» спаслалася Міністэрства гандлю і антыманапольнага рэгуляваньня, абгрунтоўваючы сваю пазыцыю супраць зьменаў у закон «Аб абароне правоў спажыўцоў». Згодна з гэтымі зьменамі інфармацыя пра тавары і паслугі павінна была б даводзіцца адначасова на дзьвюх дзяржаўных мовах, як тое і прадугледжвае Канстытуцыя.

Некаторыя карыстальнікі сацыяльных сетах абвясьцілі, што байкатуюць прадукцыю «Савушкиного продукта».

Ваша меркаваньне

Паказаць камэнтары

XS
SM
MD
LG