Лінкі ўнівэрсальнага доступу

Юры Рубцоў з жонкай у Нямеччыне пажылі ў намёце і спартзале, цяпер маюць пакой


Юры Рубцоў, архіўнае фота

Сын Юрыя Рубцова Віктар расказаў пра ўмовы, у якіх апынуліся ягоныя бацькі, якія папрасілі прытулку ў Нямеччыне.

«Кантактуем мы праз Фэйсбук, але даволі рэдка. Ды і тое не адразу пачалі, а толькі нядаўна, калі яны здолелі набыць пляншэт і празь яго нешта напісалі. Паведамілі, што яны цяпер у лягеры для ўцекачоў у Нюрнбэргу і што там умовы прымальныя, жывуць разам, у асобным пакоі, з раніцы да вечара вольныя, могуць хадзіць па горадзе. Наведваюць курсы нямецкай мовы, то бок, рыхтуюцца да атрыманьня прытулку. Спачатку бацькі прыляцелі ў Франкфурт, гэта было ў кастрычніку, яшчэ да выбараў. Там падалі заявы на прытулак і з Франкфурту іх некалькі разоў пераводзілі, давялося зьмяніць некалькі лягераў. Бацька напісаў, што былі і складаныя ўмовы, у тым ліку жылі ў намётах, у спартовай зале. У Нямеччыне цяпер складана ўцекачам, бо шмат уцекачоў з Сырыі, але ў Нюрнбергу неяк для іх сытуацыя наладзілася», — распавёў Віктар Рубцоў пра нямецкі кавалак жыцьця свайго бацькі Юрыя і маці Ядвігі.

У Гомелі ў Рубцовых застаўся дом, які Юрый і Ядвіга пачалі абжываць пасьля таго, як сёлета ў жніўні палітвязьня вызвалілі з калёніі. Тады Юры Рубцоў казаў, што не зьбіраецца нікуды зьяжджаць зь Беларусі. Рашэньне бацькі папрасіць прытулак у Нямеччыне Віктар патлумачыў тым, што ў Гомелі яго нікуды на працу не бралі:

«З былой працы, з аўташколы, дзе працаваў інструктарам па навучаньні, звольнілі, хаця лічыўся добрым адмыслоўцам, характарыстыку ў суд далі добрую. А больш нікуды ня бралі, прычым, і на ўлік як беспрацоўнага не ставілі. На „біржы“ — правіла, што перад тым, як паставяць на ўлік, трэба паспрабаваць уладкавацца там, дзе скажуць. Дык ён упарта хадзіў па ўсіх гэтых месцах, але там адно і тое — як даведаюцца, з кім маюць справу, не бяруць. Гэтак працягвалася да кастрычніка, і тады яны, відаць, вырашылі зьехаць», — кажа Віктар Рубцоў пра бацькоў.

Пра сябе Віктар кажа, што зьяжджаць зь Беларусі пакуль не зьбіраецца:

Віктар і Ядвіга Рубцовы — сын і жонка
Віктар і Ядвіга Рубцовы — сын і жонка

«Жыву ў бацькоўскім доме, спрабую тут дабудаваць, што бацькі не пасьпелі. Час ад часу працую, калі знаходзіцца праца, але з гэтым ў Гомелі цяпер вельмі дрэнна», — зазначыў сын Юрыя Рубцова.

Раней Віктар Рубцоў зьбіраўся на заробкі ў Расею, але перадумаў, бо і там эканамічнае становішча рэзка пагоршылася.

«Нашы адтуль вяртаюцца. Кажуць, што і плаціць сталі меней, і падманваюць, часта не выплачваюць заробак, „кідаюць“. Толькі патраціш грошы на дарогу ды пражыцьцё, а нічога не заробіш».

Паводле Віктара Рубцова, пытаньне аб прытулку для бацькоў мусіць вырашыцца прыкладна праз паўгода.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG