Старшыні Цэнтральнай выбарчай камісіі Беларусі Лідзіі Ярмошынай прысвоена вышэйшая кляса дзяржаўнага служачага. Адпаведны ўказ падпісаў Аляксандар Лукашэнка. Сёньня гэты дакумэнт апуб на Нацыянальным прававым інтэрнэт-партале.
Вышэйшую клясу дзяржаўнага служачага, згодна зь беларускім заканадаўствам, аўтаматычна атрымліваюць так званыя найвышэйшыя дзяржаўныя службоўцы. Гэта — прэм’ер-міністар (Кабякоў), старшыні абедзьвюх палат Нацыянальнага сходу (Мясьніковіч і Андрэйчанка), кіраўнік прэзыдэнцкай адміністрацыі (Косінец), дзяржсакратар Рады бясьпекі (Зыль), старшыня Камітэту дзяржкантролю (Алфімаў), старшыня праўленьня Нацбанку (Калаўр), кіраўнік справамі прэзыдэнта (Шэйман), а таксама намесьнікі ўсіх пералічаных асобаў. Акрамя іх, аўтаматычна вышэйшая кляса распаўсюджваецца на пасады старшыняў усіх аблвыканкамаў і Менскага гарвыканкаму.
У гэтую касту могуць трапіць таксама міністры ды некаторыя іншыя высокія службовыя асобы, якіх прызначае на пасады непасрэдна прэзыдэнт. Але для гэтага неабходны спэцыяльны ўказ кіраўніка дзяржавы. Такі ўказ адносна Ярмошынай і падпісаў Аляксандар Лукашэнка.
— Адразу скажу, што права на вышэйшую клясу я атрымала яшчэ год таму, — сказала сёньня старшыня Цэнтравыбаркаму ў размове са Свабодай. — Проста ўсе, уключаючы і наш апарат, прамаргалі гэты момант, каб своечасова пачаць афармленьне дакумэнтаў. Год таму зьявілася распараджэньне прэзыдэнта, у якім быў пералічаны шэраг пасадаў. І людзі, якія іх займаюць, могуць прэтэндаваць на атрыманьне вышэйшай альбо першай клясы дзяржаўнага службоўца. У нас цяпер амаль усе міністры маюць вышэйшую клясу. А ў сьпісе ёсьць яшчэ пералік некалькіх рэспубліканскіх камітэтаў, сярод якіх упісалі і ЦВК. А паколькі гэта было год таму, то не патрэбна гэта ніякім чынам зьвязваць з прэзыдэнцкімі выбарамі, якія адбыліся сёлета.
— А можа, гэта быў аванс, каб вас заахвоціць лепей працаваць на дзейнага кіраўніка дзяржавы?
— Пра што вы кажаце? З выбарамі гэта ніяк не зьвязана. Лічыце, што гэта падвышэньне ў клясе па пасадзе. І ня больш за тое.
— Гэтае падвышэньне неяк адаб’ецца на вашым заробку?
— Так, я буду дзесьці на мільён болей атрымліваць кожны месяц.
— І ўсё ж вернемся да выбараў. Ці прыйшла ўжо ў ЦВК канчатковая справаздача місіі Бюро дэмакратычных інстытутаў і правоў чалавека (БДІПЧ) АБСЭ, якая працавала на прэзыдэнцкай кампаніі?
— Пакуль няма. Але мы чакаем. Ад’яжджаючы, кіраўнікі місіі казалі нам, што справаздачу трэба чакаць напрыканцы лістапада. Мабыць, ужо хутка і прыйдзе».
— А што з падрыхтоўкай да парлямэнцкіх выбараў, якія маюць адбыцца ўжо ў наступным годзе? Зараз апазыцыя кажа, што да іх пачатку трэба абавязкова мяняць выбарчае заканадаўства.
— Я ня ведаю пра гэтыя размовы. У нас у Цэнтравыбаркаме няма ніводнай паперы на гэты конт, ніводнай прапановы. Карацей, ніякай ініцыятывы ад апазыцыі няма. І ад грамадзкіх арганізацыяў — таксама. Наколькі я ведаю, толькі экс-кандыдат у прэзыдэнты Караткевіч нібыта падала нейкія прапановы ў парлямэнцкую камісію. Таму, можа, адтуль і будуць паперы з мэтай высьветліць нашу пазыцыю.
— Эўразьвяз на чатыры месяцы замарозіў санкцыі супраць амаль усіх чыноўнікаў, якія знаходзяцца ў «чорным сьпісе». Ці ня думаеце скарыстацца гэтым і пабыць дзесьці ў Эўропе?
— Думаю, думаю. Ужо нават падала дакумэнты на візу. Калі ўсё будзе добра, хачу зьлятаць 14 сьнежня ў Рым. Проста паглядзець на Вечны горад.
— А вас не палохаюць тэракты?
— Калі гэтага баяцца, то тады трэба сядзець дома і нікуды ня езьдзіць. Сядзець як мыш пад венікам.
— Кіраўнікі беларускіх турфірмаў кажуць, што зараз на эўрапейскіх кірунках купляюць толькі маршруты ў Літву і Польшчу. А рухацца далей на Захад беларусы пасьля падзеяў у Парыжы баяцца.
А з той жа Літвы я, як жыхарка Калінінградзкай вобласьці, у савецкія часы, можна сказаць, не вылазіла. Па харчы туды амаль штотыдзень езьдзіла
— Мне Польшча і Літва нецікавыя. Трэба скарыстацца магчымасьцю і паглядзець тое, што я раней не магла паглядзець. А з той жа Літвы я, як жыхарка Калінінградзкай вобласьці, у савецкія часы, можна сказаць, не вылазіла. Па харчы туды амаль штотыдзень езьдзіла. Я ж там 18 гадоў пражыла.
— Вось так год за годам і ідуць. А вы ня думаеце, што ўжо пара некаму перадаваць свае выбарчыя справы?
— Ну, я, прабачце, не манарх, каб некаму перадаваць справы. Калі такі час наступіць, то знойдуць каму перадаць. Але, шчыра кажучы, Цэнтральная камісія састарэлася. Больш за палову камісіі сыдзе на заслужаны адпачынак. Таму, я думаю, на месца старшыні будзе падбірацца нейкі чалавек збоку.
— Мабыць, гэта будзе ўжо пасьля парлямэнцкіх выбараў?
— Ну канечне, нашы паўнамоцтвы яшчэ да сьнежня наступнага году.
Лідзію Ярмошыну прызначыў на старшыню Цэнтральнай выбарчай камісіі Аляксандар Лукашэнка пасьля так званага лістападаўскага рэфэрэндуму 1996 году. Перад гэтым кіраўнік дзяржавы ў парушэньне дзейнай тады Канстытуцыі сваім указам зьняў з пасады старшыні ЦВК Віктара Ганчара.
