Лінкі ўнівэрсальнага доступу

У жодзінскай турме галадаюць да 20 вязьняў, — паведамляюць праваабаронцы


Жодзінская турма

Пра галадоўку вязьняў жодзінскай турмы № 8, якіх утрымліваюць на турэмным рэжыме, паведамілі праваабаронцы з арганізацыі абароны правоў вязьняў «Новая плятформа інавэйшн». У галадоўцы бяруць удзел да 20 чалавек. Гэта вязьні з камэр № 8–16, што на першым паверсе першага корпусу турмы.

У Дэпартамэнце выкананьня пакараньняў МУС адмовіліся апэратыўна пацьвердзіць ці абвергнуць зьвесткі пра галадоўку ў жодзінскай турме. «Пішыце зварот на кіраўніка ДВП», — адказала карэспандэнту Свабоды міліцыянтка, якая працуе на тэлефоне даверу.

Дзяжурны турмы № 8 лейтэнант Русак адмовіўся нешта паведамляць пра галадоўку і называць тэлефоны, па якіх можна спраўдзіць зьвесткі праваабаронцаў.

Кіраўнік «Новай плятформы інавэйшн» Андрэй Бандарэнка сказаў Свабодзе, што вядома пра галадоўку і ад каго.

Адзін з галадоўнікаў не прымаў ежу ўжо 30 дзён

«Да нас зьвярнуліся сваякі вязьняў, якія галадаюць. Зразумела, што іх прозьвішчы мы ня можам паведаміць, каб ім не нашкодзіць. І ў калёніі нам адмовілі ў інфармацыі ды прапанавалі зрабіць запыт на імя начальніка, на які будзе дадзены адказ. Але невядома калі. Мы ж па сваіх каналах паспрабавалі спраўдзіць зьвесткі пра галадоўку, і яны пацьвердзіліся. Сёньня нам вядома, што адзін з галадоўнікаў не прымаў ежу ўжо 30 дзён, цяпер ён, верагодна, у турэмным шпіталі, як і другі вязень. Нехта зь іх дамогся, каб прызначылі апэрацыю. Ці галадаюць гэтыя два вязьні, ня ведаем, але астатнія працягваюць галадоўку. Усяго галадала да 20 чалавек з розных камэр», — кажа Андрэй Бандарэнка.

Патрабаваньні галадоўнікаў тычацца мэдычнага абслугоўваньня, побыту, унутраных парадкаў

Андрэй Бандарэнка
Андрэй Бандарэнка

«Патрабуюць нармальнага мэдычнага абслугоўваньня, скардзяцца на дрэнную ваду, якую немагчыма піць, на ежу, якую немагчыма есьці. Кажуць, што знаходзяцца ў камэрах з бэтоннай падлогай, што забаронена, але рамонту ня робяць. Што на вокнах усталявалі плястыкавыя шчыты, пасьля чаго амаль няма цыркуляцыі паветра і мала сьвятла. Што не даюць дзе сушыць рэчы, а ў камэрах ад сушкі рэчаў стаіць вільгаць, ды яшчэ і караюць за гэта. Патрабаваньняў нямала, але адміністрацыя амаль нічога ня робіць. Пра большасьць патрабаваньняў вязьням кажуць, што фінансавых магчымасьцяў няма, вось галадоўка і працягваецца», — удакладняе праваабаронца Андрэй Бандарэнка.

Праблемы з мэдычнай дапамогай і ежай у Жодзінскай турме пацьвердзіў блогер Эдуард Пальчыс, якога там утрымлівалі ў 2016 годзе. Сказаў Эдуард Пальчыс і пра сытуацыю зь пітной вадой.

Эдуард Пальчыс
Эдуард Пальчыс

«З бруднай вадой я таксама сутыкнуўся. Увесь час казалі, што ідуць нейкія рамонтныя працы — замена труб ці нешта іншае. У выніку ў вадзе плавалі кавалкі іржы, піць было немагчыма. Але нават калі вада пайшла на выгляд чыстая, устойлівы мэталічны смак захаваўся», — кажа Эдуард Пальчыс.

Надзвычайныя здарэньні — даволі частая зьява ў турме № 8.

У студзені 2016 году ў турэмным шпіталі памёр вязень Алег Багданаў, у якога, паводле мэдыкаў, спынілася сэрца. Сваякі падазравалі, што вязень памёр ад неаказаньня яму мэдычнай дапамогі.

У верасьні 2016 году ў жодзінскай турме памёр жыхар Слуцку Ігар Барбашынскі — паводле сваякоў, яго жорстка зьбілі міліцыянты.

Яшчэ да гэтых сьмерцяў, на пачатку студзеня, у турме зрабіў спробу суіцыду 20-гадовы жыхар Салігорску Ягор Пратасеня. Ён увайшоў у кому і памёр у сакавіку 2016 году.

Ваша меркаваньне

Паказаць камэнтары

XS
SM
MD
LG