Вулічныя баі ў Кіеве. Забітыя і параненыя

Януковіч хоча перамоваў

Прэзыдэнт Украіны Віктар Януковіч заклікае апазыцыю сесьці за стол перамоваў і спыніць супрацьстаяньне.

«Яшчэ раз прашу людзей не паддавацца на заклікі палітычных радыкалаў. Яшчэ ня позна спыніцца і ўрэгуляваць канфлікт мірным шляхам. Яшчэ раз заклікаю апазыцыю сесьці за стол перамоваў і спыніць супрацьстаяньне. Я супраць кровапраліцьця, супраць ужываньня сілы, супраць распальваньня варожасьці і гвалту», — заявіў Януковіч.

Ён заклікаў людзей «вяртацца ў хаты» і выказаў спачуваньні ў сувязі з гібельлю людзей у канфлікце, «справакаваным экстрэмістамі ад палітыкі».

Дэпутат Раман Кашулінскі пад час мітынгу на Эўрамайдане заклікаў жанчын ісьці па хатах, астатнім групавацца і бараніць Майдан. Народныя дэпутаты разыходзяцца пад барыкадах.

Аляксандар Турчынаў з трыбуны Эўрамайдану заклікаў людзей, якія ня ўпэўненыя ў сабе, пакінуць Майдан, а іншым умацоўваць абарону барыкадаў, адстаяць Эўрамайдан.

Снайпэры на даху

Паводле зьвестак сайту Спротив, на даху Ўкраінскага Дому знаходзяцца снайперы, якія страляюць у пратэстоўцаў.

Генеральная пракуратура падцвердзіла сьмерць дзьвух пратэстоўцаў у выніку раненьняў ад пальнае зброі, МУС запэўняе, што яе байцы не карыстаюцца агнястрэльнай зброяй.

Спэцназу стала значна болей, уся вуліца Грушэўскага запоўненая. Гараць шыны з разбуранай барыкады.

Адзін з параненых, адвезеных хуткай, журналіст, з бэджам, паведаміў канал espreso.tv. Ён без прытомнасьці.

«Беркут» пайшоў у атаку. Бачна як 10 чалавек захапілі аднаго чалавека і накінуліся на аднаго, моцна зьбілі і арыштавалі.

Мітынгоўцы пайшлі ў чарговую контратаку. Спэцназ вярнуўся да спаленых аўтобусаў.

Тэлеканал «1+1»: Адзін з забітых у Кіеве — беларус

«Я на гэтую тэму размаўляць ня буду», — заявіла Марына Есіна, супрацоўніца беларускай амбасады ў Кіеве.

«Беркут» штурмуе. Мітынгоўцы адступаюць. Спэцназ захапіў Эўрапейскую плошчу.

Фатограф Сяргей Грыц: «Цэляцца па журналістах»

Снайпэр трапіў у беларускага журналіста

Беларускага фотажурналіста Васіля Фядосенку, які цяпер здымае для агенцтва Ройтэрз ў Кіеве, траўмавалі гумовай куляй.

«Беркут» захапіў другую барыкаду на вуліцы Грушэўскага.

«Беркут» стаў у дзьве лініі, адна лінія стала ў «чарапаху», іншыя разьбіраюць адну з барыкад. Мітынгоўцы кідаюць камяні, міліцыя выкарыстоўвае шумавыя гранаты. Чакаецца новая атака «Беркута», больш маштабная, чым раніцай.

Журналісты адыходзяць ад эпіцэнтра.

«Забойства мірных пікетоўцаў — гэта наступства беспакаранасьці выканаўцаў злачынстваў і эскаляцыі тэрору», — гаворыцца ў сумеснай заяве «Бацькаўшчыны», партыі «УДАР» і «Свабоды».

«Беркут» атакуе

Спэцназ прайшоў першую барыкаду, стаўшы упрытул да другой барыкады, атуліўшыся з усіх бакоў шчытамі, так званай «чарапахай».

Прэм’ер-міністар Украіны Мікалай Азараў назваў радыкальных пратэстоўцаў у цэнтры Кіева тэрарыстамі.

Спэцназ пачаў выцясьняць мітынгоўцаў шчытамі.

Сілы спэцназу «Беркут» на вуліцы Грушэўскага ўзмоцненыя, яны пачалі шчытамі адцясьняць мітынгоўцаў.