Міністэрства ўнутраных спраў Чэхіі стварыла падразьдзяленьне па барацьбе з прапагандай з Расеі і іншымі спробамі замежных дзяржаў уплываць на думкі жыхароў краіны, перадае Reuters заяву кіраўніка ведамства Мілана Хованца.
У новай структуры працуюць 20 чалавек. Яны будуць рэагаваць на дэзынфармацыю, выкарыстоўваючы сацыяльныя сеткі, а таксама вучыць чыноўнікаў барацьбе зь ёй.
«Мы хочам трапіць у кожны смартфон», — заявіў Хованец.
Масква пакуль не камэнтуе заявы чэскага міністра.
У верасьні Служба інфармацыйнай бясьпекі Чэхіі (BIS) у сваёй штогадовай справаздачы заявіла, што Расея вядзе супраць краіны «інфармацыйную вайну».
Паводле зьвестак чэскай контравыведкі, Масква арганізавала працу цэлай сеткі агентаў і групаў, якія займаюцца прапагандай і распаўсюджваньнем інфармацыі, якая ганіць Эўразьвяз, Украіну і NATO. На думку ўладаў Чэхіі, гэтая сетка можа быць выкарыстана для дэстабілізацыі сытуацыі ў краіне.
Паводле перапісу 2011 году, у Чэхіі каля 30 тысяч рускамоўных жыхароў. У краіне працуюць дзясяткі сайтаў, якія публікуюць навіны на расейскай мове.
