Changan толькі два гады таму выйшаў на расейскі рынак, цяпер пачаў актыўна прадавацца ў іншых краінах СНД.
На беларускі рынак Changan выйшаў з мадэльлю красовэра CS 35, вытворчасьць якога пачалі ў 2012 годзе, у 2016 мадэль прайшла рэстайлінг. Як сьцьвярджае вытворца, дызайн аўта распрацаваны ў Італіі пад кіраўніцтвам дызайнэра Лючана д’Амброзія, за шасі адказныя адмыслоўцы з ЗША, над інтэр’ерам працуюць японскія адмыслоўцы, рухавікамі займаюцца ў Вялікай Брытаніі. Рухавік мадэлі CS 35 выраблены з алюмінію, мае магутнасьць 113 конскіх сілаў пры аб’ёме 1,6 літра, забясьпечвае максымальную хуткасьць 180 кілямэтраў на гадзіну.
Паводле дылераў, пасьля мадэлі CS 35 ў Беларусі могуць зьявіцца іншыя мадэлі маркі «Чанган».
У Беларусі ня толькі прадаюць, але і зьбіраюць кітайскія аўтамабілі, а вось выраб аўтамабіляў вядомых кітайскіх фірмаў не заўсёды суправаджаецца посьпехам.
З 2013 года на пляцоўцы супольнага прадпрыемства «Белджы» у Барысаве зьбіралі аўтамабіль Geely, але пазьней пляцоўка была закрытая, пачалося будаўніцтва новага заводу непадалёк ад Жодзіна, дзе плянуецца вырабляць ужо кітайскія аўты.
Geely па-беларуску: вырабіць 60 тысяч аўтамабіляў, прадаць у 10 разоў менш
Увод гэтага прадпрыемства быў заплянаваны на пачатак 2017 году, але быў адкладзены. У будаўніцтва новага заводу ўжо ўклалі больш за 250 мільёнаў даляраў.