Больш за 80 тысяч рублёў хабару атрымаў дырэктар менскага камунальнага прадпрыемства, выявілі сьледчыя.
Дырэктара затрымалі 1 сакавіка ў час атрыманьня чарговага хабару на суму 650 даляраў, ён заключаны пад варту. Ягоная маёмасьць на 440 тысяч рублёў канфіскаваная, справа перададзеная ў суд.
Як сьцьвярджаюць сьледчыя, са студзеня 2011 году па сакавік 2017-га дырэктар браў грошы ў прадстаўнікоў камэрцыйнай кампаніі за заключэньне дамоваў на пастаўку сьвятлафораў і камплектнага абсталяваньня.
Затрыманага абвінавачваць у атрыманьні хабару ў асабліва буйным памеры (ч.3 арт. 430 КК РБ), яму пагражае ад 5 да 15 год пазбаўленьня волі.
Пра якія фірмы і якое менскае камунальнае прадпрыемства вядзецца гаворка, не ўдакладняецца. Партал Tut.by мяркуе, што гаворка пра дырэктара «Спэцыялізаванага мантажна-эксплюатацыйнага прадпрыемства Менгарвыканкаму», якое абслугоўвае менскія сьвятлафоры. Прадпрыемства ад 2011 году ўзначальваў Мікалай Драневіч, увесну кіраўнік зьмяніўся.