Лінкі ўнівэрсальнага доступу

«Белпошта» і «Белсаюздрук» адрэагавалі на абяцаньні Лукашэнкі незалежным газэтам


Belarus - A newsstand "Belsayuzdruk" in Minsk, 2016

Рэдактар «Газеты Слонімскай» Віктар Валадашчук атрымаў адказы зь «Белпошты» і «Беласаюздруку» на просьбу ўключыць ягонае выданьне ў падпісны каталёг і распаўсюджваць праз шапікі.

Зь «Белсаюздруку» пішуць, што заява на распаўсюд «Газеты Слонімскай» у шапіках прынятая да разгляду і ў далейшым рэдакцыю паінфармуюць аб прынятым рашэньні.

«Белпошта» паведамляе, што ў першы квартал году «Газета Слонімская» ня можа быць унесена ў падпісны каталёг, але цяпер фармуецца падпісны каталёг на другі квартал 2017 году, падпісаньне дамоваў з выданьнямі будзе адбывацца напрыканцы сакавіка, і пра гэта рэдакцыю пісьмова папярэдзяць.

Рэдактар Віктар Валадашчук сказаў Свабодзе, што, відавочна, «Белпошта» і «Белсаюздрук» пачалі рэагаваць на абяцаньні, якія Лукашэнка даў рэдактару «Народнай Волі» Ёсіфу Сярэдзічу падчас іхняй сустрэчы. Зь іншага боку, паводле Валадашчука, гэтыя адказы яшчэ ні пра што ня сьведчаць.

Віктар Валадашчук
Віктар Валадашчук

— Мне дзіўна, што прыйшлі такія фармальныя адказы. Здавалася б, мы не заключаем нейкія звышдамовы на гандаль нафтай. То чаму, здавалася б, не прыслаць адразу адпаведныя паперы, каб я падпісаў, і на гэтым скончыць размову? Але ёсьць пакуль тое што ёсьць, а там пабачым. Усё ж Лукашэнка публічна паабяцаў вярнуць газэты ў шапікі і падпісныя каталёгі.

Пасьля сустрэчы з прэзыдэнтам Сярэдзіч назваў Беларускай асацыяцыі журналістаў поўны сьпіс выданьняў, які перадаў Лукашэнку. Гэта «Борисовские новости», «Вольнае Глыбокае», «Газета Слонімская», «Ганцавіцкі час», Intex-press, «Новы час», «СНплюс. Свободные новости плюс», «Рэгіянальная газета» і «ARCHE. Пачатак». І Лукашэнка паабяцаў вярнуць незалежныя выданьні ў «Белсаюздрук» і падпіску.

На працягу больш як дзесяці гадоў «Белпошта» адмаўляецца ўключаць адзінае на Гарадзеншчыне грамадзка-палітычнае выданьне «Газета Слонімская» ў адзіны падпісны каталёг, а «Белсаюздрук» не дазваляе прадаваць яго праз свае шапікі.

XS
SM
MD
LG