За чатыры месяцы гэтага году Беларусь страціла 180 млн даляраў на экспарце прадуктаў харчаваньня ў Расею.
Пра гэта паведаміў журналістам 3 чэрвеня першы намесьнік міністра сельскай гаспадаркі і харчаваньня Леанід Марыніч.
«Нестабільнасьць курсу расейскага рубля, цэнавы фактар, зьніжэньне аб’ёмаў — усё гэта вылілася нам у 180 млн даляраў», — цытуе БелаПАН Марыніча.
Аднак беларускі бок не зьбіраецца любым коштам аднаўляць аб’ёмы паставак харчаваньня на расейскі рынак. Паводле Марыніча, сытуацыя з экспартам беларускай сельгаспрадукцыі ў Расею стабілізавалася і ўжо дазваляе працаваць з прыбыткам.
У мінулым годзе з-за дэвальвацыі расейскага рубля экспартэры сельгаспрадукцыі страцілі больш за 360 млн даляраў.
