Лінкі ўнівэрсальнага доступу

Усясьветны банк канстатаваў, што ў Беларусі скарацілася колькасьць бедных. Экспэрт сумняваецца


Ілюстрацыйнае фота
Ілюстрацыйнае фота

Паводле высноваў Усясьветнага банку, Беларусь дамаглася ўражлівых посьпехаў у скарачэньні галечы.

Доля насельніцтва за рысай беднасьці зьнізілася з 41,9% у 2000 годзе да 5,7% у 2016 годзе. Да таго ж Беларусі ўдаецца зьніжаць паказчыкі беднасьці значна больш хуткімі тэмпамі ў параўнаньні зь іншымі краінамі рэгіёну Эўропы і Цэнтральнай Азіі. Беларускія экспэрты раяць усё ж адрозьніваць паняцьці беднасьці фізычнай і беднасьці сацыяльнай.

У аснове высокіх тэмпаў эканамічнага росту Беларусі Ўсясьветны банк адзначае магчымасьць імпартаваць расейскія энэрганосьбіты па зьніжаных цэнах, устойлівы эканамічны рост у Расейскай Фэдэрацыі і іншых краінах, якія зьяўляюцца асноўнымі гандлёвымі партнэрамі Беларусі. Таксама Ўсясьветны банк адзначае высокі ўзровень занятасьці насельніцтва і пасьлядоўны рост рэальнай заработнай платы і пэнсій.

Паводле міжнародных стандартаў, бедным лічыцца чалавек, які мае менш за 5 даляраў на дзень паводле парытэту пакупніцкай здольнасьці.

Кіраўнік аналітычнага цэнтру «Стратэгія» Леанід Заіка, якому шчыльна даводзілася кантактаваць з Усясьветным банкам, з гэтай нагоды лічыць, што ўсё бачыцца ў параўнаньні і трэба адрозьніваць фізычную галечу і сацыяльную беднасьць:

Леанід Заіка
Леанід Заіка

«Мне даводзілася ў Вашынгтоне быць ва Ўсясьветным банку, лекцыі чытаць, весьці заняткі, размаўляць. І праз 10 хвілін нашых размоваў яны мне казалі: „Так, так. Вы ведаеце лепш сытуацыю. Спрачацца ня будзем“. Чыноўнік Усясьветнага банку мае 200-300 даляраў у дзень на прадстаўнічыя выдаткі. І столькі ж — 300 даляраў, альбо 600 рублёў, — гэта заробак лекара ці дацэнта за месяц у нас.

Ёсьць беднасьць сацыяльная, ёсьць беднасьць фізычная. Паводле паказьнікаў фізычнай беднасьці мы можам канстатаваць, што ў нас амаль няма людзей, якія просяць міласьціну, жывуць на сьметніках. Магчыма, калі браць статыстыку, у Беларусі амаль няма людзей, якія жывуць за рысай фізычнага мінімуму існаваньня. Сапраўды, пэнсіі людзі атрымліваюць своечасова, але сярэдні памер пэнсіі ў Беларусі — каля 300 рублёў, гэта 150 даляраў.

Таму ўсе высновы і разьлікі Ўсясьветнага банку, магчыма, і цікавыя. Але з пункту гледжаньня рэальнай сытуацыі ці бедны прафэсар у Беларусі, калі ў яго 300 даляраў заробак? І ці багаты трохразовы алімпійскі чэмпіён Аляксандар Мядзьведзь, у якога пэнсія 323 рублі?

Ці бедны прафэсар у Беларусі, калі ў яго 300 даляраў заробак?

Відавочна, Усясьветны банк забыўся, што ў Беларусі ў 2014 годзе ВУП быў 75 мільярдаў даляраў, у 2016 годзе — на ўзроўні 47 мільярдаў. Амаль на 30 мільярдаў менш. І лягічна запытацца: як гэта можа быць, калі ВУП упаў на 38%, а беднасьць скарачаецца? Узровень беднасьці павінен прапарцыянальна вырасьці», — выказаў меркаваньне эканаміст Леанід Заіка.

Пры гэтым Усясьветны банк выказвае занепакоенасьць: «Што тычыцца будучых пэрспэктыў, фактары, якія ляжалі ў аснове посьпехаў Беларусі, вычарпалі сябе». Далей ідзе пералік: вытворчасьць працы расьце недастатковымі тэмпамі, зьніжаецца попыт на беларускую прадукцыю ў Расеі, узмацняецца пазыковая нагрузка на бюджэт, састарваюцца асноўныя фонды.

Таксама ў доўгатэрміновай пэрспэктыве абвострыцца праблема старэньня насельніцтва. Такім чынам, паводле Ўсясьветнага банку, далейшае павышэньне ўзроўню жыцьця беларусаў патрабуе новай эканамічнай палітыкі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG