Лінкі ўнівэрсальнага доступу

«Не зьбіраюся рабаваць сваіх дзяцей, каб сплаціць падатак», — у Баранавічах пратэставалі супраць дэкрэту «аб дармаедах»


Выступае Мікалай Чарнавус — малодшы

Некалькі дзясяткаў жыхароў Баранавічаў прыйшлі сёньня да мясцовай падатковай інспэкцыі, дзе ладзіўся збор подпісаў за адмену дэкрэту № 3 аб дармаедзтве. Актывісты перадалі сабраныя подпісы ў інспэкцыю, а таксама баранавіцкім дэпутатам Палаты прадстаўнікоў.

У Баранавічах подпісы за адмену гэтак званага «дармаедзкага» дэкрэту зьбіраюць Мікалай Чарнавус — старэйшы (Партыя БНФ) і Мікалай Чарнавус — малодшы (АГП). Сёньня актывісты заклікалі людзей сабрацца каля падатковай інспэкцыі і пакінуць свае подпісы пад зваротам.

Людзі зьбіраюцца каля інспэкцыі па падатках і зборах у Баранавічах
Людзі зьбіраюцца каля інспэкцыі па падатках і зборах у Баранавічах

На акцыю каля інспэкцыі прыйшлі некалькі дзясяткаў чалавек. Як сказаў Мікалай Чарнавус — малодшы, подпісы зьбіраюцца ня толькі для інспэкцыі, іх маюць накіраваць і дэпутатам Палаты прадстаўнікоў з Баранавічаў, і дэпутатцы, сябры АГП Ганны Канапацкай:

Мікалай Чарнавус — старэйшы прынёс подпісы, уклееныя ў вялікую кардонную «кнігу»
Мікалай Чарнавус — старэйшы прынёс подпісы, уклееныя ў вялікую кардонную «кнігу»

«Мы будзем зьвяртацца і да прэзыдэнта, і ў падатковую інспэкцыю, і да дэпутатаў, якія абраныя ад Баранавічаў. Гэта робіцца для таго, каб потым прэзыдэнт не сказаў, што ўсе задаволеныя, усё добра і народ згодны. Мы супраць, і мы хочам, каб улада, якая прыдумала гэты дэкрэт, ведала, што мы будзем змагацца».

Прысутныя на акцыі людзі выказвалі сваё абурэньне дэкрэтам № 3. Шмат хто з суразмоўцаў казаў, што страціў працу і ня можа цяпер яе знайсьці, іншыя — што пакуль маюць працу, але прыйшлі выказаць грамадзкую нязгоду з дэкрэтам.

Актывіст АГП Аляксандар Кабанаў зьбірае подпісы супраць дэкрэту № 3 каля падатковай інспэкцыі ў Баранавічах
Актывіст АГП Аляксандар Кабанаў зьбірае подпісы супраць дэкрэту № 3 каля падатковай інспэкцыі ў Баранавічах

«Самае першае ўзгадваньне гэтак званага дэкрэту аб „дармаедзтве“ прагучала з вуснаў былога прэмʼера, спадара Мясьніковіча. Як вядома, спадар Мясьніковіч валодае навуковай ступеньню доктара эканамічных навук. Назваць беларуса дармаедам — гэта па-за ўсялякай маральлю. І калі чалавек, які валодае навуковай ступеньню, ня можа нічога прыдумаць, то ці адпавядае ён сваёй службовай пасадзе?» — задаваўся пытаньнем жыхар Баранавічаў, які кажа, што не зьбіраецца «рабаваць сваіх дзяцей, каб сплаціць падатак», і гатовы нават пайсьці на суткі за яго нясплату.

Іншы суразмоўца, будаўнік, які застаўся бяз працы, сказаў, што, атрымаўшы «ліст шчасьця» пра неабходнасьць сплаціць 360 рублёў падатку, апратэставаў яго ў мясцовую падатковую інспэкцыю і мяркуе апратэстоўваць у вышэйшыя інстанцыі:

«Я не зьбіраюся плаціць невядома за што. Я працую часам у Расеі, але мне ня хочацца выяжджаць з краіны, пакідаць тут жонку, дзяцей... Але тут я працу знайсьці не магу. Бяз сэнсу шукаць у Баранавічах працу, прадпрыемствы становяцца, дзе такія завоблачныя сярэднія заробкі бяруцца? Колькі ў асабістых гутарках ні пытаю людзей — 500 рублёў ніхто не атрымлівае. А дзе бачылі заробкі ў 500 даляраў — я ня ведаю».

Агітацыйны білборд непадалёк ад баранавіцкай падатковай інспэкцыі
Агітацыйны білборд непадалёк ад баранавіцкай падатковай інспэкцыі

Як сказаў Свабодзе Мікалай Чарнавус — старэйшы, ён разам з сынам сабраў у Баранавічах больш за 700 подпісаў. Да падатковай інспэкцыі ён прыйшоў зь вялікай самаробнай «кнігай» з кардону, у якую ўклеены аркушы з подпісамі супраць дэкрэту аб «дармаедах».

Напрыканцы акцыі некалькі дзясяткаў подпісаў актывісты здалі ў падатковую інспэкцыю — як растлумачыў Чарнавус-малодшы, каб «абазначыць прысутнасьць незадаволеных гэтым дэкрэтам». Астатнія подпісы актывісты занесьлі баранавіцкім дэпутатам Палаты прадстаўнікоў Вользе Палітыка і Тацьцяне Якубовіч.

Міліцыянт не дазволіў журналістам здымаць працэс здачы звароту з подпісамі
Міліцыянт не дазволіў журналістам здымаць працэс здачы звароту з подпісамі

У часе здачы подпісаў у інспэкцыю здарыўся інцыдэнт зь міліцыянтам, які ахоўвае гэтую ўстанову. Міліцыянт забараняў прайсьці разам з Чарнавусамі журналістам, якія вялі відэазапіс акцыі.

Да інспэкцыі прыехалі міліцыянты
Да інспэкцыі прыехалі міліцыянты

У выніку да інспэкцыі прыехаў аўтамабіль дэпартамэнту аховы. Журналістаў разам з Чарнавусамі так і не пусьцілі, подпісы актывісты панесьлі самі.

Дэлегацыя актывістаў нясе подпісы пад зваротам супраць дэкрэту аб «дармаедах» да Баранавіцкіх дэпутатаў Палаты прадстаўнікоў
Дэлегацыя актывістаў нясе подпісы пад зваротам супраць дэкрэту аб «дармаедах» да Баранавіцкіх дэпутатаў Палаты прадстаўнікоў

Глядзець камэнтары (10)

Гэтая дыскусія закрытая.
XS
SM
MD
LG