Суд у Армэніі арыштаваў на два месяцы Сэдрака Качарʼяна, сына былога прэзыдэнта краіны Робэрта Качарʼяна, паведамляе Армянская служба Радыё Свабода з спасылкай на ягонага адваката Аляксандра Качубаева. Сэдрака Качарʼяна абвінавацілі ў адмываньні сродкаў, дапамозе ў атрыманьні буйных хабараў і злоўжываньні службовым становішчам.
Паводле Качубаева, яму абмежавалі права на зносіны, спатканьні дазволеныя толькі з жонкай і дзецьмі. Сілавікі прыйшлі зь ператрусамі да былога прэзыдэнта Робэрта Качарʼяна і яго сыноў — Лявона і Сэдрака — раніцай 25 жніўня.
У Антыкарупцыйным камітэце Армэніі заявілі, што крымінальная справа заведзеная ў дачыненьні да 10 чалавек, сярод якіх Робэрт і Сэдрак Качарʼяны, былы прэзыдэнт Сэрж Саргсьян, былы прэмʼер Андранік Маргарʼян. Паведамляли аб затрыманьні шасьці чалавек, у тым ліку Робэрта і Сэдрака Качарʼянаў.
Робэрт Качарʼян, паводле вэрсіі сьледзтва, выкарыстоўваючы сваё службовае становішча, папярэдне дамовіўшыся з найбліжэйшымі паплечнікамі «прысвоіў дзяржаўную ўласнасьць і набыў шэраг каштоўных абʼектаў грамадзкага і эканамічнага значэньня па цэнах, значна ніжэйшых за рынкавыя». Яму выставілі абвінавачаньне паводле артыкулаў аб злоўжываньні службовым становішчам, адмываньні асабліва буйных сумаў грошай і атрыманьні хабару ў асабліва буйных памерах.
Былы прэзыдэнт Робэрт Качарʼян зараз у шпіталі — яму стала блага пасьля таго, як яго напярэдадні даставілі ў антыкарупцыйны камітэт Армэніі і ён правёў там некалькі гадзін. Ягоны сын, дэпутат парлямэнту Лявон Качарʼян паведаміў, што ў бацькі былі праблемы з сэрцам, а каля двух тыдняў таму ён перанёс апэрацыю.
