Лінкі ўнівэрсальнага доступу

Зь якіх сродкаў Беларусь заплаціла аванс за расейскі газ, невядома


Пытаньне, за кошт якіх сродкаў Беларусь унесла авансавую плату за расейскі газ, застаецца адкрытым, піша БелаПАН.

13 сьнежня міністар фінансаў Уладзімер Амарын у час размовы з журналістамі ў Палаце прадстаўнікоў на пытаньне, зь якіх сродкаў — бюджэтных ці нейкіх іншых — узяты ўнесены аванс за газ, адказаў: «Гэтае пытаньне не да мяне».

Пра тое, што Беларусь ажыцьцявіла авансавы плацеж за пастаўку расейскага газу, паведаміў 8 сьнежня прэс-сакратар прэм'ер-міністра Ўладзіслаў Сычэвіч. Паводле яго, у кастрычніку 2016 году на ўзроўні ўрадаў Беларусі і Расеі былі дасягнутыя прынцыповыя дамоўленасьці і вызначаныя канкрэтныя мэханізмы рашэньня праблемных пытаньняў у нафтагазавай сфэры, аднак іх рэалізацыя зацягнулася. Ён казаў, Беларусь зацікаўленая ў як мага больш хуткім вырашэньні газавага пытаньня, таму як «жэст добрай волі» унесла авансавую плату, а ў адказ чакае аднаўленьня паставак нафты.

Пераможцы і пераможаныя газавага канфлікту

Памер платы, аб'ём і кошт аплачанага газу не называюцца. Невядома і тое, ці гэта сплата наяўнай запазычанасьці, ці аванс за будучыя пастаўкі.

Менск і Масква дагэтуль не ўрэгулявалі пытаньні кошту расейскага газу і загрузкі сыравінай беларускіх нафтаперапрацоўчых заводаў. З 2016 году Расея, паводле дамоўленасьцяў, павінна была пастаўляць у Беларусь штогод 24 млн тонаў нафты за год аж да 2024-га. Аднак з другога паўгодзьдзя пастаўкі былі скарочаныя, спачатку да 3,5 млн тон за квартал, а з кастрычніка — ужо да 3 млн тон. Гэта стала адказам на запазычанасьць па пастаўках расейскага газу ў 281 млн долараў. Беларускія НПЗ тым часам працуюць на палову магутнасьці.

Глядзець камэнтары (3)

Гэтая дыскусія закрытая.
XS
SM
MD
LG