К. Ст’юарт: ЗША рыхтуюць новыя санкцыі

Амбасадарка ЗША ў Беларусі Карэн Ст’юарт правяла прэсавую канфэрэнцыю адразу па прылёце з Вашынгтону, дзе на мінулым тыдні прадстаўнікі беларускай апазыцыі сустракаліся з прэзыдэнтам і дзяржсакратаром ЗША. І першая яе заява была рэакцыяй на зьбіцьцё Зьмітра Хведарука, Анатоля Лябедзькі, якія былі ў складзе беларускай дэлегацыі ў ЗША, ды іншых актывістаў.

“Я маю рэзка асудзіць дзеяньні ўлады супраць мірных дэманстрантаў. Учора Зьміцер Хведарук быў жорстка зьбіты супрацоўнікамі міліцыі. Ён знаходзіцца ў шпіталі, і сёньня мы працягнем спробы сустрэцца зь ім. У панядзелак пасьля мірнай дэманстрацыі прадпрымальнікаў людзі ў цывільным затрымалі 9 чалавек – Віктара Івашкевіча, Віктара Гарбачова, Віктара Крываля, Аляксея Кашкарава, Віктара Калея, Аляксандра Цацуру, Барыса Гарэцкага, Аляксандра Макаева і Крысьціну Шацікаву. Яны таксама зьбілі Анатоля Лябедзьку і затрымалі Вольгу Казуліну. Гэтыя жорсткія дзеяньні перакрэсьліваюць дасягнуты раней невялікі прагрэс, калі дэманстрацыі праходзілі мірна. Дзярждэпартамэнт ЗША выказвае занепакоенасьць гэтым, і мы спадзяёмся, што гэтым людзям будзе аказаная мэдычная дапамога”, — заявіла амбасадарка ЗША.

Кіраўніца амэрыканскай дыпляматычнай місіі заявіла, што ЗША па-ранейшаму настойваюць на вызваленьні палітвязьняў Аляксандра Казуліна, Андрэя Клімава, Зьмітра Дашкевіча, Артура Фінькевіча, Мікалая Аўтуховіча і Юр’я Лявонава.

Карэн Ст’юарт паведаміла, што ў выніку пашыраных санкцыяў трыццаці дзяржаўным чыноўнікам і чальцам іхніх сем’яў, якія зьбіраліся ў ЗША зь дзелавымі і турыстычнымі мэтамі, было адмоўлена ў амэрыканскіх візах.

ЗША плянуюць зрабіць захады, аналягічныя тым, якія ўжо зазнаў “Белнафтахім”, у дачыненьні да іншых беларускіх дзяржаўных прадпрыемстваў. На пытаньне Радыё Свабода, рахункі якіх прадпрыемстваў могуць замарозіць, амбасадарка сказала: тых, якія кантралююцца “Белнафтахімам” або асобамі, супраць якіх былі ўведзеныя санкцыі, а таксама тых, дзе Аляксандар Лукашэнка асабіста прызначыў кіраўніка прадпрыемства. Каб пазьбегнуць новых санкцыяў, беларускія ўлады павіны зрабіць наступныя крокі, заявіла амбасадарка ЗША ў Беларусі:

“Злучаныя Штаты і Эўразьвяз надалей спадзяюцца, што ўлады вызваляць палітвязьняў, што Беларусь выканае свае абавязаньні адносна правядзеньня свабодных і справядлівых выбараў і забясьпечыць для беларусаў асноўныя правы чалавека. Гэта не наіўнае спадзяваньне. Злучаныя Штаты ўвесь час дыскутуюць з Эўразьвязам наконт Беларусі. І мы працягнем рабіць адпаведныя крокі, каб сфакусаваць міжнародную ўвагу на людзях, якія нясуць адказнасьць за адсутнасьць прагрэсу ў нашых дачыненьнях. У той жа час мы і надалей будзем па-сяброўску ставіцца да беларускага народу”, — заявіла амбасадарка ЗША.

Карэн Ст’юарт адзначыла, што для ЗША і надалей прыярытэтам застанецца падтрымка незалежных сродкаў масавай інфармацыі. Амбасадарка выказала сумнеў, ці адбудзецца істотны прагрэс у стварэньні так званай саюзнай дзяржавы Беларусі і Расеі ў часе візыту прэзыдэнта Ўладзімера Пуціна ў Беларусь.

Супраць створанага нядаўна беларуска-вэнэсуэльскага прадпрыемства па здабычы нафты Злучаныя Штаты, праўдападобна, ня будуць уводзіць эканамічныя санкцыі, паколькі “Белнафтахім” — малодшы партнэр у гэтай кампаніі, заявіла Карэн Ст’юарт.