“Я быў у начальніка калёніі, той даў мне тэлефон старшыні шклоўскага раённага суду, сказаў, што ён можа гэтае пытаньне вырашыць. Я датэлефанаваўся да яго, а ён не захацеў са мной гаварыць — сказаў, што гэта не ягоная кампэтэнцыя.
Я зноў пайшоў да начальніка. Там быў старшыня дэпартамэнту выкананьня пакараньняў у Магілёўскай вобласьці. Ён сказаў, што судзьдзя парушыў закон — ён павінен быў вырашыць гэтае пытаньне, так ці гэтак. Мы тут ні пры чым, мы толькі ахоўваем.
Не хачу быць злым прарокам, але нічога добрага я не чакаю. Няхай прабачыць мне сын”.
Вячаслаў Дашкевіч паведаміў, што яго не пусьцілі на суд над сынам Зьмітром у шклоўскай папраўчай калёніі №17. Сёньняшняе судовае паседжаньне ў справе лідэра незарэгістраванай арганізацыі "Малады фронт" Зьмітра Дашкевіча, які ўжо адбывае пакараньне, было закрытым.