Аналітыкі зьвярнулі ўвагу на словы міністра замежных спраў Расеі Сяргея Лаўрова, які ў нядаўнім дакумэнтальным фільме расейскага «Першага каналу» пра Расейскую праваслаўную царкву заявіў, што паўднёвы ўсход Украіны і большая частка цэнтральнай Украіны, уключна з Кіевам, нібыта зьяўляюцца «традыцыйна расейскімі землямі».
Лаўроў таксама заявіў, што Масква павінна дасягнуць сваіх ваенных мэтаў ва Ўкраіне і перамагчы так званую русафобію на «тэрыторыі, якая цяпер называецца Ўкраінай».
У ISW адзначаюць, што падобныя заявы расейскіх чыноўнікаў гучаць ня ўпершыню. Масква даўно спрабуе апраўдаць уварваньні ва Ўкраіну ў 2014 і 2022 гадах сьцьвярджэньнямі пра нібыта гістарычную прыналежнасьць украінскіх земляў Расеі. У прыватнасьці, расейскія прадстаўнікі называлі «расейскімі» Харкаў, Мікалаеў і Адэсу.
Аднак, паводле аналітыкаў, апошняя заява Лаўрова ахоплівае яшчэ большую тэрыторыю Ўкраіны, чым ранейшыя прэтэнзіі Масквы.
«Пастаянныя заявы прадстаўнікоў Крамля аб непахіснай рашучасьці Масквы рэалізаваць свае маштабныя ваенныя мэты несумяшчальныя зь нядаўнімі прапановамі ЗША аб спыненьні вайны, пра якія паведамлялі СМІ», — адзначаюць у ISW.
20 лістапада прэзыдэнт ЗША Дональд Трамп заявіў, што бачыць «рэальны шанец» дасягнуць выніку на мірных перамовах паміж Расеяй і Ўкраінай.
У той жа час Уладзімір Пуцін пасьля трохбаковай сустрэчы лідэраў Расеі, ЗША і Кітаю ў Шэньчжэні 19 лістапада адхіліў ідэю поўнага або частковага спыненьня агню.
Украіна і Эўразьвяз настойваюць, што менавіта спыненьне агню павінна стаць першым крокам да мірнага пагадненьня. Масква адмаўляецца ад такога падыходу і працягвае патрабаваць прызнаньня расейскімі ня толькі акупаваных тэрыторыяў, але і ўсёй тэрыторыі чатырох украінскіх абласьцей, якія яна незаконна ўключыла ў сваю канстытуцыю.
Форум