Віцэ-прэм’ер-міністар Расеі Марат Хуснулін паведаміў, што ў выніку ўкраінскіх атак пашкоджаныя асноўная бэлька пралёту арачнага мосту і сама арка Крымскага мосту. Ягоныя словы прыводзіць «Интерфакс».
«Мы разумеем, што ў нас цяпер пашкоджаная асноўная бэлька пралёту арачнага мосту. Сама арка пашкоджаная», — сказаў ён журналістам.
Украіна атакавала мост тры дні запар — 17, 18 і 19 лістапада. У выніку другога ўдару абрынуўся ўчастак аўтамабільнай часткі мосту і арка над ім.
Паводле Хуснуліна, існуюць два варыянты аднаўленьня мосту, усе неабходныя работы ўжо вядуцца. Дакладныя тэрміны, паводле яго, вызначаць пасьля зацьвярджэньня інжынэрных праектных рашэньняў.
Прафэсар катэдры грамадзянскага і экалягічнага будаўніцтва ва Ўнівэрсытэце Халіфы ў Абу-Дабі Андрэас Капас сказаў The New York Times, што аднаўленьне руху па аўтамабільным мосьце зойме каля двух гадоў, калі будаўніцтва ня будзе перапыненае новымі ўкраінскімі ўдарамі і калі не былі пашкоджаныя апоры, якія падтрымліваюць арачны пралёт.
Паводле выданьня, сталёвыя кампанэнты аркі цягам некалькіх месяцаў выраблялі на заводзе ў Варонежы, пасьля чаго яе зварвалі каля 11 месяцаў. Амэрыканскі інжынэр-будаўнік Дональд Д’юсэнбэры адзначыў, што, калі давядзецца рамантаваць апоры мосту, гэта яшчэ больш ускладніць работы.
Прэзыдэнт Украіны Ўладзімір Зяленскі раней заявіў, што ўдары па мосьце ў Крым— гэта адказ на атакі па ўкраінскіх мастах.
Прэзыдэнт Расеі Ўладзімір Пуцін на прэсавай канфэрэнцыі ў Кітаі сказаў, што пасьля ўдару па мосьце праз Керчанскую пратоку расейскія ўлады з Украінай «дамаўляцца ня будуць» і паабяцаў «балючы адказ».
Што папярэднічала
Украінскія вайскоўцы аднавілі ўдары па Крымскім мосьце 16 лістапада. На наступны дзень, 17 лістапада, у выніку атакі ў мора абрынулася адна арка і аўтамабільны пралёт даўжынёй амаль 300 мэтраў.
Як паведамілі пазьней у Службе бясьпекі Ўкраіны, гэтая апэрацыя складалася з 7 этапаў і рыхтавалася прыблізна месяц — спачатку «выбівалі» расейскую супрацьпаветраную абарону, а потым пачалі атакі проста на мост.
Для зьнішчэньня мосту выкарыстоўвалі ракеты-дроны «Паляниця», а таксама іншыя бесьпілётнікі, у тым ліку Dovbush, «Вендета», Da Vinci, «Січень», Mich-2000, Ruta, «Ан-197», FP-1, а таксама ракеты «Фламінго» і «Нептун».
Апошняя атака стала пятым моцным ударам украінскіх сілаў па мосьце, пачынаючы з 2022 году, тры зь іх адбыліся ў ноч на 16, 17 і 18 лістапада 2026 году.
Форум