Таксама Хуан выйдзе з рады дырэктараў Nvidia.
Ён быў адным з заснавальнікаў і чацьвёртым па велічыні акцыянэрам кампаніі з доляй каля 3,61%.
На перадрынкавых таргах акцыі Nvidia патаньнелі больш чым на 10%, пацягнуўшы ўніз і рынак у цэлым.
Раней зьявіліся паведамленьні, што 63-гадовы Джэнсэн Хуан меў пазашлюбную сувязь з Эліс Хуан (супадзеньне прозьвішчаў выпадковае), кітайскай бізнэсоўкай, якую ўлады ЗША падазраюць у шпіянажы. Пэкін адмаўляе, што Эліс Хуан зьяўляецца шпіёнкай.
11 лістапада скандал абвастрыўся пасьля таго, як The New York Times паведаміла, што Хуан таксама меў раман зь віцэ-прэзыдэнткай Nvidia ў пытаньнях аховы здароўя Кімбэрлі Паўэл, якая была ягонай падначаленай.
Паводле паведамленьняў мэдыя, Вашынгтон таксама расьсьледаваў дзейнасьць Megaspeed, афіцыйнага воблачнага партнэра Nvidia. Кампанію падазравалі ў тым, што яна дапамагала Кітаю атрымліваць перадавыя чыпы для ШІ, пастаўкі якіх абмежаваныя амэрыканскімі правіламі экспартнага кантролю.
8 лістапада прэзыдэнт ЗША Дональд Трамп заявіў, што Хуан «зрабіў надзвычай шмат для нашай краіны» і што кіраўнік Nvidia сказаў яму, што ня меў паняцьця, што кітаянка, зь якой у яго быў раман, была шпіёнкай.
Кампанія Nvidia раней была найперш вядомая сваімі відэакартамі. Але здольнасьць ейных чыпаў адначасова рабіць мноства вылічэньняў зрабіла іх асновай імклівага разьвіцьця штучнага інтэлекту. Гэтак Nvidia стала найдаражэйшай кампаніяй у сьвеце, хоць цяпер ужо страціла гэты статус.
На Тайвані і ў Паўднёвай Карэі Хуана атачалі натоўпы прыхільнікаў, якія прасілі яго падпісаць кнігі, плякаты, а часам нават пакінуць аўтограф на іхных целах. Ягоны ўплыў быў настолькі вялікім, што простая згадка пра нейкую кампанію адбівалася на кошце ейных акцый.
«Джэнсэна ўспрымалі як галоўную публічную асобу ШІ, прычым ня толькі ў Nvidia, але і ў галіне ў цэлым», — адзначыла старэйшы рынкавы аналітык Capital.com Даніэла Гэтарн. — «Ягоны сыход з пасады дадае рынку нэрвознасьці напярэдадні публікацыі фінансавай справаздачнасьці на наступным тыдні і, відавочна, пасярод цяперашняга абвалу акцыяў кампаніяў, зьвязаных з ШІ».
«Рызыка ня ў тым, што Nvidia раптам страціць сваю тэхналягічную дарожную мапу... Гэтая дарожная мапа ў асноўным праглядаецца на некалькі гадоў наперад. Рызыка палягае ў рэалізацыі. Джэнсэн быў галоўным дырыжорам надзвычай складанай сыстэмы», — сказаў кіраўнік партфэлем ClearBridge Investments Майкл Фэлдман.
«Сыстэма ўзаемазьвязаных угодаў Nvidia з значнай часткай індустрыі выклікае пытаньне, што яна стварыла: большую стабільнасьць ці большую ўразьлівасьць», — заўважыў у камэнтары Reuters галоўны рынкавы аналітык Interactive Brokers Стыў Созьнік.
Форум