Як паведаміла польскае выданьне Rzeczpospolita, цяпер у сьпісе 40 971 чалавек.
«Агульная колькасьць іншаземных грамадзян, чыё знаходжаньне на тэрыторыі Рэспублікі Польшча лічыцца непажаданым, складае 40 971 чалавек. У пэрыяд з 1 студзеня па 30 верасьня гэтага году ў сьпіс былі ўключаныя 19 738 асоб», — працытавала выданьне Катажыну Сівак, якая прадстаўляе Ўпраўленьне ў справах іншаземцаў.
Паводле яе, цяпер у сьпісе 14 300 украінцаў, больш за 4 000 грузінаў, 3 500 расейцаў і 2300 беларусаў.
Згодна з інфармацыяй выданьня, сёлета Польшча выправадзіла з сваёй тэрыторыі 2500 іншаземцаў, у тым ліку 1420 грамадзян Украіны. У той жа час Rzeczpospolita не ўдакладняе гэтую статыстыку датычна беларусаў.
За што можна трапіць у лік непажаданых асоб
У рэестар асоб, чыё знаходжаньне ў Польшчы лічыцца непажаданым, уваходзяць іншаземцы, якія парушылі закон. Сярод іх тыя, хто ўчыніў злачынствы ці знаходзіцца ў вышуку ў Эўропе і іншых рэгіёнах, асобы, якія ня маюць сапраўдных віз, працуюць або засталіся ў Польшчы нелегальна, нягледзячы на афіцыйныя патрабаваньні пакінуць краіну, за крадзяжы, шматразовыя парушэньні правілаў дарожнага руху, выкарыстаньне скрадзеных рэгістрацыйных нумароў, крадзеж паліва на запраўках і гэтак далей.
Паводле ўладаў Польшчы, сьпіс «непажаданых» асоб пашыраецца, паколькі выяўляюць усё больш людзей, якія дапускаюць парушэньні або дзейнічаюць насуперак закону.
Сьпіс іншаземцаў, знаходжаньне якіх у Польшчы непажаданае, вядзе Ўпраўленьне ў справах іншаземцаў. Запісы ў гэты пералік уносяцца па хадайніцтве кіраўнікоў розных службаў — такіх як паліцыя, памежная служба, Агенцтва ўнутранай бясьпекі, Агенцтва вонкавай выведкі, кіраўнік Нацыянальнай падатковай адміністрацыі, міністар нацыянальнай абароны або міністар замежных спраў.
Форум