Размова адбылася 20 кастрычніка ў Варшаве падчас цырымоніі ўручэньня польскай прэміі «Залаты ляўр». Лешэк Бальцэровіч атрымаў узнагароду ў намінацыі «Асоба 35-годзьдзя» за ўнёсак у эканамічную трансфармацыю Польшчы.
На просьбу даць параду беларусам эканаміст найперш загаварыў пра неабходнасьць палітычнага адзінства.
«Найважнейшая парада — гуртавацца вакол дэмакратычных лідэраў. Вы маеце выдатных лідэраў. Трэба іх падтрымліваць, каб зрынуць Лукашэнку», — сказаў Бальцэровіч.
На пытаньне, адкуль у палякаў напрыканцы 1980-х гадоў узялася сьмеласьць для радыкальных пераменаў, Бальцэровіч адказаў, што тады краіна апынулася ў стане эканамічнай катастрофы.
«Гэта не патрабавала вялікай сьмеласьці. У нас была эканамічная катастрофа — дык што, уцякаць ад яе? Не!» — падкрэсьліў Бальцэровіч.
Ён параўнаў радыкальныя эканамічныя рэформы з мэдычнай апэрацыяй, якая неабходная, калі пацыент цяжка хворы.
Лешэк Бальцэровіч таксама падкрэсьліў, ня ўсе беларусы прыслухаюцца да яго парады. Аднак, паводле яго, у Беларусі дастаткова людзей, якія бачаць, што адбываецца ў суседніх краінах, у тым ліку ў Польшчы.
Напрыканцы размовы эканаміст пажадаў беларусам посьпехаў.
Бальцэровіч выказаў пашану «сапраўдным героям Беларусі»
Узнагароду «Асоба 35-годзьдзя» Лешэку Бальцэровічу ўручыў рэктар Варшаўскай школы эканомікі (SGH) Пётар Ваховяк. У сваёй прамове ён назваў эканаміста адным з галоўных творцаў эканамічнага посьпеху Польшчы і падкрэсьліў ягоную ролю ў пераўтварэньнях пасьля 1989 году.
Бальцэровіч, прымаючы ўзнагароду, ужо на пачатку выступу зьвярнуўся да беларускай тэмы. Ён выказаў словы падтрымкі беларусам у прысутнасьці ляўрэата Нобэлеўскай прэміі міру Алеся Бяляцкага, журналіста Анджэя Пачобута і лідэркі беларускіх дэмакратычных сілаў Сьвятланы Ціханоўскай.
«Я хацеў бы выкарыстаць хаця б дзесяць сэкундаў, каб выказаць глыбокую пашану сапраўдным героям у Беларусі і салідарнасьць з прадстаўнікамі Ўкраіны, у тым ліку з прысутным тут амбасадарам», — заявіў эканаміст.
Лешэк Бальцэровіч падкрэсьліў, што дзеяньні гэтых людзей маюць надзвычайнае значэньне ня толькі для іхных краінаў, але ўскосна і для самой Польшчы.
Гаворачы пра ўласныя заслугі, ён адзначыў, што рэфармаваньне краіны і яе эканомікі не зьяўляецца справай аднаго чалавека. Бальцэровіч нагадаў, што каманда, зь якой ён пазьней праводзіў польскія рэформы, пачала рыхтаваць прапановы эканамічных пераўтварэньняў яшчэ ў 1970-я гады.
Напрыканцы выступу эканаміст яшчэ раз выказаў глыбокую пашану героям зь Беларусі і салідарнасьць з Украінай.
Хто такі Лешэк Бальцэровіч
Лешэк Бальцэровіч — польскі эканаміст, адзін з ключавых аўтараў эканамічнай трансфармацыі Польшчы пасьля падзеньня камуністычнага рэжыму.
У 1989–1991 гадах ён займаў пасады віцэ-прэмʼера і міністра фінансаў Польшчы. Пад ягоным кіраўніцтвам быў распрацаваны і ўведзены ў дзеяньне пакет радыкальных эканамічных рэформаў, вядомы як «плян Бальцэровіча», альбо «шокавая тэрапія».
Рэформы, якія пачаліся ў 1990 годзе, былі скіраваныя на пераход ад плянавай сацыялістычнай эканомікі да рынкавай, стрымліваньне гіпэрінфляцыі і разьвіцьцё прадпрымальніцтва.
Пераўтварэньні суправаджаліся сурʼёзнымі сацыяльнымі наступствамі, у тым ліку ростам беспрацоўя, закрыцьцём нерэнтабэльных прадпрыемстваў і падзеньнем даходаў часткі насельніцтва. Аднак яны таксама заклалі аснову для далейшага разьвіцьця рынкавай эканомікі Польшчы.
У 1997–2000 гадах Бальцэровіч паўторна займаў пасаду віцэ-прэмʼера і міністра фінансаў, а ў 2001–2007 гадах узначальваў Нацыянальны банк Польшчы.
Форум