«Мы абяцаем прасоўваць цэлі спэцыяльнай ваеннай апэрацыі, яны цудоўна ўсім вядомыя, мы іх ніколі не мянялі, у адрозьненьне ад зыгзагаў Зяленскага і яго эўрапейскіх гаспадароў. Таму нам няма ў чым і перад кім апраўдвацца», — заявіў Сяргей Лаўроў 12 кастрычніка на прэсавай канфэрэнцыі ў Маскве.
Кіраўнік расейскай дыпляматыі намякнуў, што Расея і Ўкраіна не дамаўляліся аб спыненьні агню. Паводле яго, гэтая заява падпарадкавана адной мэце — «выгандляваць час для таго, каб атрымаць перадышку, ён (Зяленскі. — РС) нават сказаў, што і выбары гатовы прэзыдэнцкія правесьці, калі яму дадуць два месяцы сабрацца зь сіламі».
«За гэты пэрыяд Эўропа зможа яго напампаваць новымі ўзбраеньнямі для працягу яго тэрарыстычнай вайны супраць расейскага народу. Яго штучнае зьдзіўленьне з нагоды заявы прэзыдэнта Трампа адлюстроўвае толькі адно: яму вельмі хочацца выкарыстоўваць любыя словы, любыя ініцыятывы, любыя ідэі, якія трапляюць у публічную прастору, для таго каб усімі праўдамі і няпраўдамі прасоўваць сваю зацікаўленасьць у перадышцы. Я ня думаю, што перадышку ён заслужыў», — заявіў Лаўроў.
Што папярэднічала
11 кастрычніка прэзыдэнт ЗША Дональд Трамп заявіў, што паміж Расеяй і Ўкраінай нібыта пачало дзейнічаць энэргетычнае замірэньне, пра якое, паводле ягоных словаў, «дамовіліся абодва бакі».
«Зь сёньняшняга дня (11 кастрычніка. — РС) неадкладна ўступае ў сілу энэргетычнае замірэньне ў вайне паміж Расеяй і Ўкраінай. Абодва бакі пагадзіліся. Не парушайце яго!» — напісаў Трамп у сацыяльнай сетцы Truth Social.
Ён падзякаваў чытачам за ўвагу да гэтага пытаньня, але не паведаміў іншых падрабязнасьцяў дамоўленасьці.
Прэзыдэнт Украіны Ўладзімір Зяленскі заявіў пра гатоўнасьць Украіны да энэргетычнага замірэньня з Расеяй, аднак падкрэсьліў, што Кіеў не дамаўляўся пра яго пачатак 11 кастрычніка. Пра гэта ён сказаў у камэнтары амэрыканскаму выданьню Axios.
«Абвяшчэньне пра спыненьне агню стала для мяне навіной. Але калі расейцы пагодзяцца на энэргетычнае замірэньне, Украіна таксама пагодзіцца. Калі прэзыдэнт Трамп дамовіўся пра гэта з Пуціным, калі ласка, паведаміце нам, калі пачынаецца замірэньне. Мы гатовыя і прымем яго», — заявіў Зяленскі.
Трамп ужо рабіў падобную заяву 14 верасьня, аднак тады Кіеў і Масква не пацьвердзілі дасягненьня дамоўленасьці. Прэзыдэнт Украіны Ўладзімір Зяленскі заяўляў пра гатоўнасьць да ўзаемнага спыненьня ўдараў па энэргетычнай інфраструктуры, калі Расея таксама спыніць атакі.
23 верасьня дзяржаўны сакратар ЗША Марка Рубіё пасьля сустрэчы з кіраўніком расейскага МЗС Сяргеем Лаўровым заявіў, што Расея і Ўкраіна зацікаўленыя ў часовым спыненьні ўзаемных удараў па энэргетычнай інфраструктуры і аб’ектах, зьвязаных з экспартам сельскагаспадарчай прадукцыі.
Раней Рубіё адзначаў, што пагадненьня аб энэргетычным замірэньні пакуль няма, хоць такая дамоўленасьць была б «цалкам лягічнай».
Лаўроў, у сваю чаргу, заявіў, што Расея ня будзе прыпыняць так званую «спэцыяльную ваенную апэрацыю» дзеля перамоваў у любым фармаце.
22 верасьня пасьля перамоваў з Трампам Зяленскі заявіў, што Ўкраіна гатовая да якога-хаця фармату энэргетычнага замірэньня з Расеяй.
Форум