Беларускі журналіст і мэдыямэнэджар Андрэй Аляксандраў, які застаецца ў зьняволеньні ў Беларусі, стаў адным з ляўрэатаў прэміі Free Media Awards 2026.
Узнагарода прысуджаная яму «за мужнасьць і прыхільнасьць справе абароны свабоды прэсы і свабоды слова ва ўмовах усё больш рэпрэсіўнага рэжыму»:
«Дзякуючы сваёй працы ў незалежным беларускім інфармацыйным агенцтве „БелаПАН“ і Беларускай асацыяцыі журналістаў (БАЖ) ён спрыяў умацаваньню прафэсійных стандартаў журналістыкі, падтрымцы незалежных СМІ і стварэньню міжнародных сетак журналістаў і праваабаронцаў. Андрэй Аляксандраў быў арыштаваны за сваю дзейнасьць у 2021 годзе. У 2022 годзе яго пакаралі на 14 гадоў пазбаўленьня волі па сфабрыкаваных абвінавачаньнях. Ён прызнаны палітычным зьняволеным», — гаворыцца на сайце Fritt Ord.
У ліку іншых ляўрэатаў гэтага году журналіст сайта «Українська правда» Міхаіл Ткач, грузінскае выданьне iFact, армянскі Factor TV і расейскае выданьне «Верстка».
Цырымонія ўручэньня прэміі Free Media Awards адбудзецца ў Музэі Мунка ў Осла 29 верасьня 2026 году.
Прэмію прысуджаюць нарвэскі The Fritt Ord Foundation і нямецкі ZEIT-Stiftung Bucerius журналістам Усходняй Эўропы. Яна ўручаецца незалежным СМІ і журналістам Усходняй і Цэнтральнай Эўропы.
Перасьлед Андрэя Аляксандрава
Андрэй Аляксандраў — журналіст і мэдыямэнэджар, працаваў намесьнікам дырэктара інфармацыйнага агенцтва БелаПАН.
Аляксандрава затрымалі 12 студзеня 2021 году, за кратамі ён больш за 5 гадоў.
Яго асудзілі на 14 гадоў зьняволеньня, абвінаваціўшы паводле 4 артыкулаў Крымінальнага кодэксу ўключна з ч. 1 арт. 356 («здрада дзяржаве») і ч. 1 арт. 361-1 («удзел у экстрэмісцкім фармаваньні»).
У верасьні 2022 году ў менскім СІЗА на вуліцы Валадарскага Андрэй Аляксандраў ажаніўся з Ірынай Злобінай, таксама палітзьняволенай. Яны раней жылі разам і разам былі арыштаваныя. Ірыну Злобіну асудзілі на 9 гадоў зьняволеньня, яна адбывае пакараньне ў гомельскай жаночай калёніі.
З канца студзеня 2023 году журналіст адбывае пакараньне ў наваполацкай калёніі № 1.
