Тэрыторыя вайсковай часткі ва Ўруччы паводле задумы вучэньняў ператварылася ў густанаселены раён, ахоплены беспарадкамі.
«Агрэсіўна настроены натоўп» кідаў у міліцыянтаў камяні і «кактэйлі Молатава». «Радыкалы, якіх каардынавалі праз Telegram», заблякавалі дарогу на завод, «каб паралізаваць ягоную працу», і падпалілі аўтамабіль, гаворыцца ў паведамленьнях МУС.
Сілавікі «заходзілі з тылу, манэўравалі на матацыклах паміж машынамі, выцягвалі завадатараў і перадавалі іх групам затрыманьня».
Вызваліць закладнікаў з спартовага комплексу дапамог службовы сабака, які «нэўтралізаваў аднаго з узброеных злачынцаў», што дазволіла бясьпечна ўвайсьці ў будынак асноўнай групе байцоў.
Аўтобус і шматпавярховы будынак штурмавалі з выкарыстаньнем БПЛА.
«Пасьля 2020 году заканадаўства перагледжанае, і сёньня ў нас дастаткова рычагоў і магчымасьцяў, — заявіў міністар Кубракоў. — Калі для выкананьня задачы патрабуецца дзейнічаць нестандартна — значыць, так і рабіце. Я вас заўсёды падтрымаю», — дадаў ён.
Сілавікі сярод іншага адпрацавалі прыцягненьне спэцтэхнікі МНС. Міністар унутраных спраў Іван Кубракоў заявіў, што супольныя дзеяньні сілавікоў і ратавальнікаў трэба давесьці да аўтаматызму.
«Асаблівасьць прысталічнага рэгіёну ў тым, што вобласьць вялікая, тут засяроджаная вялікая колькасьць буйных прадпрыемстваў і арганізацыяў, якія могуць стаць аб’ектамі ўзьдзеяньня дэструктыўных сілаў», — заявіў Кубракоў.
У сваёй прамове ён згадаў рэзананснае абрабаваньне ювэлірнай крамы ў Менску. Паводле Кубракова, пры затрыманьні байцы антытэрарыстычнага падразьдзелу «Алмаз» дзейнічалі ў нестандартнай абстаноўцы.
«Прамаруджаньне магло каштаваць жыцьця: у злачынцы быў нож, а перад ім у аўтобусе сядзела дзіця», — сказаў Кубракоў
Што папярэднічала і чаму гэта важна
Сёлета па ўсёй краіне праводзяць вучэньні падразьдзелаў МУС. У некалькіх выпадках улады ўдакладнялі мэту іх правядзеньня — на выпадак тэрарыстычных актаў, патрэбы прыкрыцьця дзяржаўнай мяжы, стварэньня рэзэрваў і іх своечасовай перадысьлякацыі пры патрэбе або для спыненьня «масавых беспарадкаў».
З пачатку поўнамаштабнай вайны Расеі супраць Украіны ў 2022 годзе на тэрыторыі Беларусі, улады якой падтрымалі гэтую агрэсію, практычна безь перапынку праводзяць вучэньні вайсковых і іншых парамілітарных падразьдзелаў.
Аляксандар Лукашэнка ня раз заяўляў аб пагрозах ад Украіны і іншых суседзяў Беларусі, у тым ліку тэрарыстычных. Гэта аніразу ня мела пацьверджаньня.
Форум