Крадзёж адбыўся ўвечары ў суботу, 15 жніўня. Невядомыя зламысьнікі праніклі ў будынак музэя і вынесьлі карціны. Паводле слоў кіраўніцтва музэя, сыгналізацыя была ўключана, але злачынцам удалося абысьці і яе, і індывідуальныя сыстэмы бясьпекі, якія ахоўвалі менавіта гэтыя экспанаты.
Скрадзеныя чатыры вельмі каштоўныя працы мастака Адраджэньня: тры з пяці панэляў «Паліптыха сьвятога Рыгора» і ўнікальная двухбаковая карціна, на адным баку якой намалявана Мадона з немаўлём, а на абароце — П’ета, сцэна аплакваньня Хрыста. Каб выкрасьці яе, злачынцам прыйшлося ўскрыць шкляную вітрыну. Мяркуецца, што першапачаткова злодзеі выкралі шэсьць карцін Месіны, але дзьве знайшліся ў будынку музэя: па невядомай прычыне злачынцы пакінулі іх.
Паліпціх Сьвятога Рыгора першапачаткова складаўся як мінімум зь пяці частак. Карціна была пашкоджана падчас магутнага землятрусу ў 1908 годзе.
Яшчэ адна скрадзеная праца, «Мадонна з немаўлём», была прададзена на аўкцыёне Christie’s у 2003 годзе за больш чым 300 000 долараў.
Міністр культуры Італіі Алесандра Джулі выказаў «шок і шкадаваньне» з нагоды крадзяжу. Ён падкрэсьліў, што скрадзеныя творы маюць «надзвычайную каштоўнасьць для нашай культурнай спадчыны».
Мэр Месіны Федэрыка Базіле назваў крадзеж «жахлівым злачынствам». Ён назваў асабліва абуральным тое, што злачынства адбылося падчас традыцыйных гарадскіх святкаванняў у гонар Дзевы Марыі.
«Мы спадзяемся, што злачынцы будуць выяўленыя і што нашы творы мастацтва вернуцца дадому. Месіна не дазволіць скрасьці сваю гісторыю», — напісаў мэр у сацыяльных сетках.
Крадзеж адбыўся ўсяго праз некалькі месяцаў пасьля таго, як італьянская дзяржава набыла на аўкцыёне ў Нью-Ёрку яшчэ адну працу Антонэла да Месіны «Ecce Homo». За карціну было заплачана амаль 15 мільёнаў долараў.
«Гэта вельмі сурʼёзная і значная страта, — гаворыць дырэктар музэя Марыза Мэркурыё. — Выкрадзены работы вялізнай культурнай, мастацкай і сымбалічнай каштоўнасьці ня толькі для Месіны. Усё, што мы зараз можам — спадзявацца, што яны як мага хутчэй будуць вернуты».
Музэй у нядзелю і, магчыма, найбліжэйшымі днямі будзе закрыты для правядзеньня сьледчых мерапрыемстваў.
- Тым часам італьянская паліцыя знайшла тры карціны П’ера Агюста Рэнуара, Поля Сэзана і Анры Маціса, выкрадзеныя ў сакавіку з музэя Фонду Маньяні-Рока непадалёк ад Пармы. Агульная цана твораў перавышае дзевяць мільёнаў эўра, паведамляе Reuters.
- Карціны знайшлі ў доме аднаго з падазраваных у Парме. Па словах начальніка паліцыі горада Андрэа Пальяра, расьсьледаваньне вядзецца ў дачыненьні да дзевяці грамадзян Малдовы. Пяцёх зь іх падазраюць непасрэдна ва ўчыненьні крадзяжу.
- Абрабаваньне адбылося ў ноч на 23 сакавіка і заняло менш за тры хвіліны. На апублікаваным паліцыяй запісы з камэраў назіраньня відаць, як два чалавекі з закрытымі тварамі праніклі ў будынак праз акно. Яны накіраваліся ў залю, дзе знаходзіліся карціны, зьнялі іх са сьцяны і перадалі саўдзельніку, які чакаў звонку.
Форум