Паводле слоў губэрнатара Андрэя Вараб’ёва, Маскоўская вобласьць пацярпела ад аднаго з найбуйнейшых нападаў за апошні час, у гэтым рэгіёне загінуў адзін пажылы мужчына, яшчэ трое чалавек атрымалі раненьні.
У горадзе Падольск у выніку ўдараў бесьпілётнікаў загарэўся склад Wildberries у індустрыяльным парку Каледзіна, паведаміў Варабʼёў. Ён дадаў, што супрацоўнікаў адвезьлі ў сховішча, ніхто не пацярпеў. Маніторынгавыя каналы публікуюць фота і відэа наступстваў удару.
У выніку нападу ў падмаскоўным Дамадзедаве загарэўся склад з лекамі, паведаміў Варабʼёў.
З вечара 15 жніўня ў Маскву ляцелі яшчэ 600 дронаў, паведаміў мэр сталіцы Сяргей Сабянін. Паводле яго слоў, у Маскоўскай вобласьці быў знішчаны 201 дрон. У выніку нападаў каля МКАД тры чалавекі атрымалі раненьні. Сабянін не ўдакладніў абставіны, пры якіх гэта адбылося.
Пацярпела і Растоўская вобласьць Расеі. Тры чалавекі загінулі, яшчэ адзін атрымаў раненьні, паведаміў губэрнатар Юрый Слюсар. Чыноўнік не ўдакладніў, які абʼект быў мэтай удару.
Wildberries паскарае будаўніцтва лягістычнага цэнтру ў «Вялікім камені»
Расейская кампанія Wildberries паскоранымі тэмпамі завяршае будаўніцтва лягістычнага цэнтру ў індустрыяльным парку «Вялікі камень» пад Менскам. Кампанія ўжо набірае беларускіх супрацоўнікаў, а расейскія спэцыялісты прыехалі для іх падрыхтоўкі.
Пасьля ўкраінскіх удараў па складах Wildberries у Расеі беларускі цэнтар можа стаць дадатковай лягістычнай пляцоўкай кампаніі. Аднак эканамічны аглядальнік Аляксандар Кныровіч лічыць, што сур’ёзных рызыкаў для Беларусі пакуль ня бачыць. Паводле яго, беларускія склады ў 10–15 разоў меншыя за расейскія і ня змогуць іх замяніць. За апошнія тыдні былі атакаваныя больш за дзясятак складоў кампаніі ў розных рэгіёнах Расеі.
Украінскія вайскоўцы пакуль не камэнтуюць гэтыя ўдары
З пачатку паўнамаштабнага ўварваньня Расеі розныя абʼекты на тэрыторыі Расейскай Фэдэрацыі, а таксама ў акупаваных рэгіёнах Украіны, падвяргаліся авіяўдарам. Генэральны штаб Узброеных сіл Украіны пацьвердзіў большаюць нападаў, заявіўшы, што Армія абароны Украіны «сыстэматычна рэалізуе меры, накіраваныя на зьніжэньне баявога патэнцыялу расейскіх акупацыйных войскаў, а таксама на прымушэньне Расейскай Фэдэрацыі спыніць узброеную агрэсію супраць Украіны».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум